Një shqiptar është dënuar me 7 vite e 6 muaj burgim nga drejtësia në Britani, pasi ishte kapur me një sasi të madhe kokaine dhe një shume parash, kur makina e tij u ndalua nga policia në Brentford. Bëhet fjalë për 27-vjeçarin Gleni Goleci, emigrant ilegal në Britaninë e Madhe.
Vendimi është dhënë këtë të enjte nga Gjykatën e Kurorës në Isleworth, ku Goleci, pa vendbanim fiks në Mbretërinë e Bashkuar, u shpall fajtor për trafik të lëndëve narkotike dhe pasuri e pajustifikuar.
Mediat angleze raportojnë se ai ishte duke vozitur përgjatë Brentford High Road me një Hyundai më 7 janar të këtij viti, kur iu kërkua të ndalonte pranë Pottery Road.
Kur automjeti u kontrollua nga oficerët e Policisë angleze, i gjetën 1.5 kilogramë kokainë dhe afërsisht 20,000 paund para cash, në një strehë të sofistikuar të projektuar posaçërisht në bagazh. Ai operohej nga një sistem butonash të cilët duhej të shtypeshin në një rend të caktuar.
Oficerët kontrolluan gjithashtu një apartament në Holland Gardens, Brentford, dhe gjetën 6 kilogramë kokainë dhe 60,000 £ të tjera para cash. Droga ishte fshehur pas një divani dhe brenda një dollapi.
Ata gjetën gjithashtu një kopje të pistoletës ajrore Colt dhe pajisje të lidhura me furnizimin me drogë, duke përfshirë peshore, një thikë, një fletore me “listën e shënimeve” dhe një kuti të madhe dorezash të disponueshme.
Raportohet se 7.5 kilogramë drogë kishte një vlerë të vlerësuar në rrugë prej 350,000 £.
