Policia e Tiranës ka arrestuar një person, i cili qarkullonte me automjet i armatosur me armë zjarri. Po ashtu është arrestuar edhe personi që ndodhej me të në automjet.
Në kuadër të operacionit të koduar “Flagranca 2” janë vënë në pranga shtetasit Armando Kashari, 37 vjeç, për veprën penale “Armëmbajtja pa leje” dhe Amarild Zaçe, 39 vjeç, për veprën penale “Moskallëzim krimi”.
“Në kuadër të këtij operacioni, në rrugën “Isuf Elezi”, shërbimet e Policisë kanë ndaluar për kontroll, automjetin që drejtohej nga shtetasi Armando Kashari, dhe pasagjer Amarild Zaçe.
Gjatë intervistimit nga punonjësit e policisë të dy këta shtetas kanë shfaqur shenja nervozizmi. Në vijim të veprimeve, pas kontrollit fizik të ushtruar ndaj shtetasit Armando Kashari, shërbimet e Policisë kanë gjetur në brez një armë zjarri pistoletë dhe municion luftarak, të cilat u sekuestruan në cilësinë e provës materiale.” – thuhet në njoftimin e bluve të kryeqytetit.
Materialet procedurale i kaluan Prokurorisë, për veprime të mëtejshme.
