Një informacion operative i mbërritur në Policinë e Shkodër ka mobilizuar këta të fundit duke ushtruar kontrolle në ambiente të spitaleve me qëllim gjetjen e dy personave të shpallur në kërkim për ngjarjen e 2 shkurtit në Malësi të Madhe.
Në kërkim janë shpallur shtetasit Erion Vocrri, 22 vjeç, nga fshati Hot i Ri dhe Rivaldo Zmijanej alias Rivaldo Planaj, 27 vjeç, nga fshati Shtoj i Vjetër, të cilët akuzohen për veprat penale “Kanosja” dhe “Mbajtja pa leje dhe prodhimi i armëve, armëve shpërthyese dhe i municionit”. Gjatë momentit të sulmit, ata rezultojnë të kenë lëvizura me motor dhe besohet se njëri prej tyre të jetë i plagosur në pjesën e këmbëve.
Pavarësisht kontrolleve nuk është arritur të zbulohet vendndodhja apo lokacioni i tyre. Pavarësisht se dy persona janë shpallur në kërkim hetimet po shtrihen edhe tek përfshirja e personave të tjerë në ngjarje.
Kjo sipas burimeve konfidenciale të siguruara nga Ora News në vendin e ngjarjes janë gjetur gëzhoja të kalibrave të ndryshme çka do të thotë se janë përdorur më shumë se dy armë te ndryshme.
Pavarësisht se policia lokale ka dal në pistën e një grabitje të mundshme kjo nuk është përfundimtare. Për shkak të sekretit hetimor mbi ngjarjen policia shprehet mjaft e rezervuar e ndërsa po verifikohen disa kamera te tjera sigurie kryesisht drejt ato që ndodhen drejt qëndres se qytetit.
Rivaldo Zmijanej alias Rivaldo Planaj është nipi i Bardhok Pllanajt, i njohur ndryshe si “Kumbari”, i cili është ekzekutuar më 4 Prill të vitit 2021.
Çfarë ndodhi në fshatin Gruemirë të Malësisë së Madhe?
Burime bëjnë me dije se Erion Vocrri dhe Rivaldo Zmijanej (Pllanaj) kishin shkuar me motor dhe të maskuar për të vjedhur në fshatin Gruemirë, por fillimisht kanë gjuajtur me armë ndaj kamerave të sigurisë të vendosura në banesën e familjes Kurtaj dhe më pas u larguan drejt një zone malore.
Pas disa orësh, gjatë mbrëmjes, Erion Vocrri dhe Rivaldo Zmijanej (Pllanaj) u rikthyen nga zona malore, por këtë herë u përballën me tre vëllezërit Mirsad, Besim dhe Edison Kurtaj, të cilët i pritën në rrugë me një automjet.
Ata i kanë ndaluar dhe kanë debatuar me njëri-tjetrin, por gjatë debatit Erion Vocrri dhe Rivaldo Zmijanej (Planaj) kanë gjuajtur me armë zjarri në ajër dhe janë larguar.
Tre djemtë e familjes Kurtaj u vunë në ndjekje të autorëve, e cila ka zgjatur për rreth 10 minuta dhe ka patur mbi 100 plumba të shtënë me breshëri në tokë dhe në ajër.
Në një moment, njëri prej autorëve është rrëzuar nga motori, por arriti të largohej nëpër fushat e mbjella të fshatit.
Sulmi në Malësi të Madhe/ Njëri prej autorëve është nipi i “Kumbarit” të Shkodrës
