Kreu i opozitës gjermane Friedrich Merz përjashtoi sot mundësinë e bashkëpunimit të Unionit të tij Demokristian (CDU) me Alternativën për Gjermaninë (AfD) të krahut të djathtë.
“Ne nuk do të bashkëpunojmë me AfD-në, as para (zgjedhjeve), as pas, kurrë. AfD kundërshton gjithçka që vendi ynë dhe partia jonë ka ndërtuar vitet dhe dekadat e fundit”, tha ai në kongresin e partisë CDU.
Merz theksoi se është i sigurt se CDU do të fitojë zgjedhjet e planifikuara për 23 shkurt, pa ndihmën e AfD-së, e cila është e dyta në sondazhe, raporton Guardian.
Merz kritikoi gjithashtu protestat, të cilat u zhvilluan gjatë fundjavës pasi CDU theu një premtim për të mos bashkëpunuar me AfD, duke vënë në dukje hipokrizinë e pretenduar të demonstruesve dhe një rritje të antisemitizmit.
Ai theksoi se kurrë më parë “urrejtja” ndaj Izraelit nuk është shprehur aq sa është tani dhe se reagimi i gjermanëve ndaj antisemitizmit është shumë “i pavendosur”.
Merz tha se nëse qeveria e tij fiton zgjedhjet, ajo do të kapërcejë sfidat dhe se përndryshe ekziston rreziku që Gjermania të përfshihet nga një valë populizmi i majtë ose i ekstremit të djathtë.
