54-vjeçari Valmir Lame nga fshati Kamenicë i Korçës është gjetur i mbytur në rezervuarin e fshatit.
Ai rezultonte i zhdukur që prej të dielës së 26 Janarit, kur ishte larguar nga banesa e tij dhe nuk ishte kthyer më. Një ditë më pas, kushëriri i 54-vjeçarit, shtetasi A. V., 61 vjeç, bëri kallëzim në Policinë e Korçës ku kërkoi ndihmën e autoriteve për gjetjen e tij, por deri më sot nuk kishte asnjë gjurmë nga Valmir Lame.
Pas dyshimeve të familjarëve dhe uniformave blu se ai mund të ishte mbytur në rezervuarin e Kamenicës, polumbarët e RENEA-s nisën ditën e sotme kërkimet dhe gjetën trupin e pajetë.
Vëllai i viktimës, Dashnor Lame në një prononcim për mediat deklaroi kur nisën kërkimet se Valmiri kishte prej kohësh probleme shëndetësore, por nuk ishte larguar më parë nga banesa dhe merrej me blegtori.
“Ka humbur që të dielën, e kemi kërkuar në çdo vend. Kemi kërkuar ndihmën e policisë dhe pastaj të polumbarëve. Policia bëri ekspertizën këtu në rezervuar, do bëhet më pas procesverbali që ti jepet Drejtorisë së Policisë e të shikojmë se çfarë do bëjmë. Afër rezervuarit kemi bagëtitë që i mbajmë aty. Nuk kishim punë të rëndë që dhe vëllai të largohej nga fshati. Ai ishte i sëmur kohët e fundit. Kishte 2-3 muaj me dhimbje koke sepse ka pasur probleme shëndetësore që i vogël dhe ka vajtur shumë herë në spital. I kanë bërë vizita dhe i kanë thënë të paraqitej më datë 5 shkurt. Kjo është hera e parë që na ndodh kështu, nuk ishte larguar më parë.”, – tha i vëllai i Valmir Lames.
