Vllaznia pritet të paraqitet me disa ndryshime në formacion për ndeshjen e së premtes me Teutën, në krahasim më përballjen e fundit në kampionat.
Shkodranët duan të lënë pas humbjes me Egnatian dhe stafi teknik duket se do të prekë disa pika në formacionin kuqeblu.
Rikthimi në gjendjen optimale fizike i garanton Ardit Krymit një fanellë titullari ndaj durrsakëve dhe më të rrezikuarit për t’u ulur në stol janë Amir Kahrimanoviç dhe Ardit Deliu. Kroati ende nuk po jep atë çfarë pritet në kampin shkodran dhe me shumë mundësi nuk e nis nga minuta e parë sfidën në Durrës.
Dilema ka edhe për mbrojtjen, konkretisht për partnerin e Stojanoviçit në qendër, pasi Bajrami është i skualifikuar me kartonë, dhe për krahun e majtë. Këtë rol e ka mbuluar Çoba prej javësh, por kthimi i Jagos, i cili u paraqit mirë ndaj Egnatias për aq sa luajti, e ka vënë në mendime trajnerin Brdariç.
Gjermani pritet të vendosë pas seancës së fundit stërvitore për të gjitha këto dilema. Ai synon të ketë një skuadër sa më të ekuilibruar në transfertën durrsake.
