Ish-drejtuesi i Prokurorisë së Krimeve të Rënda, Eugen Beçi, ka ngritur një çështje të rëndësishme pas intervistës ekskluzive të Arben Ahmetajt në SYRI TV. Mbrëmjen e sotme në bisedën me moderatorin Çim Peka i ka vënë në dukje se deklaratat e Ahmetajt mund të përbëjnë një indicie të re për rihapjen e dosjes së ish-ministrit të Brendshëm, Saimir Tahiri.
Sipas Beçit, vendimet gjyqësore që dënuan Tahirin nuk janë thjesht një konkluzion mbi veprimet e tij personale, por vërtetojnë ekzistencën e një procesi të gjerë të kanabizimit në Shqipëri gjatë kohës që ai drejtonte Ministrinë e Brendshme. Më konkretisht, gjykatat kanë arsyetuar se Tahiri, në një mënyrë ose në një tjetër, ka shërbyer në kanabizimin e vendit, duke lejuar dhe mundësuar përhapjen e këtij fenomeni në të gjithë territorin shqiptar.
Beçi ngre pyetjen nëse ky proces ishte pasojë e neglizhencës së institucioneve shtetërore apo një veprim i mirëorganizuar ku mund të kenë qenë të përfshirë zyrtarë të tjerë të lartë, madje edhe vetë kreu i qeverisë. Ai sugjeron se ekziston mundësia ligjore për rihapjrn e dosjes së Tahirit, dhe se kjo duhet të shoqërohet me marrjen në pyetje të disa ish-ministrave, të cilët sipas tij kanë debatuar në mbledhjet e qeverisë mbi këtë çështje.
“Aty në intervistën e Ahmetajt unë hasa një informacion shumë të rëndësishëm, i cili procedurialisht do t’i vinte në ndihmë Prokurorisë së Posaçme për të rihapur një dosje të rëndësishme. Themi për të rihapur, sepse kemi të bëjmë me dosjen e Saimir Tahirit.
Nga dy vendimet e parashikuara nga Gjykata e Shkallës së Parë dhe nga Gjykata e Apelit, ku është dënuar Saimir Tahiri, pavarësisht nga rezervat që kam unë për dënimin e tij me prova apo pa prova, kjo është tjetër histori.
Aty Prokuroria e Posaçme gjykon që gjykatat, në mënyrë të drejtpërdrejtë, kanë arsyetuar dhe kanë thënë: “Ka shërbyer në kanabizimin e vendit”.
Duke iu referuar vetëm vendimeve të cilat kanë shpallur fajtor ish-ministrin e Brendshëm Saimir Tahiri, në ato vendime gjykata ka vërtetuar faktin penal të ekzistencës së ‘kanabizimit të vendit në tërë Shqipërinë’. Madje, gjykata, me të drejtë apo pa të drejtë, i ka dhënë një formë kriminale Saimir Tahirit, duke e quajtur atë si përgjegjës për kanabizimin dhe, në pikëpamje penale, e ka quajtur lidhjen shkak-pasojë të veprimeve, duke e shoqëruar me shpërdorimin e detyrës dhe kanabizimin e vendit.
Atëherë, thjesht dhe pastër rezulton që del një indicie e re, e cila duhet të vërë në lëvizje këtë dosje të vjetër për të realizuar procesin e verifikimit, minimalisht të disa rrethanave. E para, është kryer në mënyrë rastësore dhe vetëm nga grupet kriminale, nga neglizhenca e shtetit, apo, në frymën e kësaj interviste, kemi të bëjmë me faktin që një organizatë kriminale ka kryer procesin e rekrutimit të të gjithë qeverisë dhe të kreut të saj për të realizuar procesin e kanabizimit? Dhe, që të zbresim në tokë fare, si realizohet kjo gjë?
Rifillohet çështja. Në rast se nuk ke çështje të veçuar, merren dhe ripyetën të paktën 5 persona që kanë qenë ministra dhe kanë debatuar në lidhje me këtë rast konkret. Merret dhe administrohet mbledhja e qeverisë ku është bërë ky debat, dhe të gjitha këto rrethana të bëjnë që të rishikosh mënyrën sesi shpërdorimi i detyrës ka qenë vetëm te Saimir Tahiri apo ka qenë te e gjithë qeveria dhe sesi është organizuar procesi i kanabizimit të vendit. Është rastësi apo është pakujdesi?
Të gjitha këto elemente, duke administruar intervistën, të bëjnë të mos e quash provë në vetvete intervistën, por ta quash indicie, që të paktën Erion Veliaj, Saimir Tahiri, Ditmir Bushati, Damian Gjiknuri, Arben Ahmetaj të merren dhe të thirren nga Prokuroria e Posaçme dhe të pyeten: kur e keni bërë këtë bisedë, në cilin ambient e keni bërë këtë bisedë dhe pse ka qenë argument kundërshtues i kreut të qeverisë?
Të gjitha këto rrethana të çojnë në faktin e thjeshtë: kanabizimi që solli pasoja për krimin e organizuar në Shqipëri, si ka ardhur dhe si është krijuar?“, tha ai.
