Policia e Mirditës në bashkëpunim me atë të Lezhës dhe të Tiranës kanë ekzekutuar një operacion për goditjen e veprimtarisë kriminale të kultivimit dhe prodhimit të kanabisit dhe të armëmbajtjes pa leje.
Si rezultat, në kuadër të operacionit i koduar “Double Strike” janë vënë në pranga dy vëllezërit I. D., 40-vjeç dhe P. D., 45-vjeç, banues në fshatin Kullaxhi, Mirditë.
Gjatë kontrollit të ushtruar nga efektivët e Policisë në magazinën dhe banesën në pronësi të dy vëllezërve, raportohet se janë gjetur drogë, armë zjarri e gjahu, municion luftarak, radio si të Policisë e sende të tjera të kundraligjshme.
“Nga kontrolli në magazinë u gjetën dhe u sekuestruan në cilësinë e provës materiale tre thasë me kanabis në formë boçeje gjithsej 24.5 kilogramë.
Ndërsa nga kontrolli në banesë dhe territorin banesës u gjetën dy armë zjarri ( kallashnikov e pushkë), 4 armë gjahu, 2 radio marrëse-dhënëse si të Policisë, 1 shkop gome, 1 shkop bejzbolli, 1297 fishekë luftarak dhe 17 fishekë çifteje.
Armët e zjarrit do dërgohen për ekspertim në Institutin e Policisë Shkencore për të parë nëse janë përdorur më parë për kryerje të veprave penale kundër personit.” – thuhet në njoftimin e Policisë
Dy vëllezërit akuzohen për veprat penale “Mbajtja pa leje dhe prodhimi i armëve, armëve shpërthyese dhe i municionit” , “Prodhimi dhe mbajtja pa leje e armëve të gjuetisë dhe sportive”, “Prodhimi dhe shitja e narkotikëve”, “Fshehja e të ardhurave”, “Mbajtja pa të drejtë e uniformës”, kryer në bashkëpunim.
Materialet procedurale i kaluan Prokurorisë së Lezhës për veprime të mëtejshme.
