Një grevë e udhëhequr nga studentët bëri që të mbyllen shumë biznese të premten në gjithë Serbinë, ndërsa Presidenti Aleksandar Vuçiç ka organizuar një tubim të madh për të kundërshtuar protestat e vazhdueshme antiqeveritare, që kanë sfiduar kontrollin e tij mbi pushtetin.
Mijëra veta iu bashkuan gjithashtu bllokadave të përditshme të trafikut në qytete dhe qyteza të ndryshme në vendin ballkanik, në shenjë kujtimi ndaj 15 viktimave që la pas vetes shembja e një çatie në një stacion hekurudhor në muajin nëntor.
Shumëkush në Serbi beson se çatia e rëndë e betonit në një stacion treni në qytetin verior të Novi Sadit, u rrëzua për shkak të punës së parregullt të rindërtimit, pasojë e korrupsionit.
Protestat në të cilat kërkohet përgjegjësi për aksidentin, janë më të mëdhatë që kur Presidenti Vuçiç mori pushtetin më shumë se një dekadë më parë. Ai është përballur me akuza për frenim të lirive demokratike pavarësisht se zyrtarisht kërkon anëtarësimin e Serbisë në Bashkimin Evropian.
Nuk ishte e mundur menjëherë të përcaktohej se sa njerëz dhe kompani iu përgjigjën thirrjes së studentëve për një grevë të përgjithshme njëditëshe, së cilës iu bashkuan restorante, bare, teatro, furra buke, dyqane dhe librari të ndryshme.
Presidenti Vuçiç ka organizuar një tubim të mbështetësve të tij në qytetin qendror të Jagodinës. Ai ka njoftuar planet për të formuar një lëvizje politike mbarëkombëtare në stilin e presidentit rus Vladimir Putin, që do të ndihmonte në sigurimin e dominimit të Partisë së tij Përparimtare Serbe të krahut të djathtë.
Presidenti dhe mediat pro qeveritare i kanë akuzuar studentët se punojnë nën urdhrat e shërbimeve të huaja të zbulimit për të përmbysur autoritetet, ndërsa banditë pro qeveritar kanë sulmuar vazhdimisht protestuesit.
Nuk u raportua ndonjë incident gjatë bllokadës 15-minutëshe të trafikut të premten që filloi në orën 11:52 kohën e shembjes së çatisë në Novi Sad.
Gjatë një bllokade javën e kaluar në Beograd, një makinë u përplas me studentët protestues, duke plagosur rëndë një grua.
Universitetet serbe janë bllokuar prej dy muajsh, së bashku me shumë shkolla. Një shoqatë avokatësh gjithashtu ka hyrë në grevë, por ishte e paqartë se sa punonjës të institucioneve shtetërore iu bashkuan grevës të premten.
Parakalime protestuese u mbajtën të premten në Beograd, Novi Sad dhe qytetin jugor të Nishit.
“Gjërat nuk mund të jenë më njësoj”, tha aktori Goran Susljik për televizionin rajonal N1. “Studentët na kanë ofruar një mundësi për një ndryshim”.
Prokurorët e Serbisë kanë ngritur akuza kundër 13 personave për shembjen e çatisë duke përfshirë një ministër të qeverisë dhe disa zyrtarë shtetërorë. Por ish-ministri i ndërtimit Goran Vesiç është liruar nga paraburgimi, duke nxitur dyshimet mbi pavarësinë e hetimeve.
Stacioni kryesor hekurudhor në Novi Sad u rinovua dy herë në vitet e fundit si pjesë e një marrëveshjeje më të gjerë të punëve në infrastrukturë me kompanitë shtetërore kineze./VOA
