Shëndeti i kryepeshkopit të Kishës Ortodokse Autoqefale Shqiptare, Anastas Janullatos ka pësuar një përkeqësim të shpejtë mëngjesin e kësaj të premteje, pasi ka pësuar dështim shumëorganësh dhe ndodhet në gjendje kritike.
Anastas Janullatos ndodhet i shtruar prej rreth 20 ditësh në spitalin Evangjelismos në Athinë dhe më pak 24 orë më parë i është nënshtruar një trakeostomie.
Një javë më parë, ai iu nënshtrua një operacioni për ndalimin e gjakderdhjes. Gjatë kësaj kohe dhe pas operacionit, Kryepeshkopi ka qenë në intubim, ku mjekët tentuan ta nxirrnin nga intubimi, por përpjekjet rezultuan të pasuksesshme.
Në këto rrethana, bluzat e bardha vendosën që kryepeshkopi t’i nënshtrohej trakeostomisë, që është një procedurë e nevojshme në rastet e intubimit të zgjatur mbi 15-20 ditë. Përmes kësaj procedure kirurgjikale, bëhet një hapje në trake apo në grykë për të krijuar frymëmarrje.
95-vjeçari u shtrua në një spital në Tiranë më 30 Dhjetor pas një infeksioni të rëndë dhe më 3 Janar kryepeshkopi u transferua drejt Athinës.
Gjendja e tij shëndetësore është e rënduar si për shkak të historisë së tij mjekësore, por edhe për shkak të moshës.
