Tre persona janë arrestuar nga Policia e Durrësit, të cilët akuzohen se kanë kanosur me armë zjarri një 44-vjeçar.
Në kuadër të operacionit të koduar “Intervention” janë vënë në pranga shtetasit Ylli Murati, 40 vjeç, Bajram Roçi, 30 vjeç dhe Bekim Çera, 30 vjeç, të tre banues në Tiranë.
Sipas Policisë së Durrësit, ngjarja ka ndodhur në rrugën “Pavarësia” të qytetit bregdetar, ku tre shtetasit e mësipërm kanë kanosur me armë zjarri për motive të dobëta një 44-vjeçar dhe janë kapur në flagrancë.
Të arrestuarit kanë qenë me tre automjete, njëri prej tyre i blinduar në përdorim nga Ylli Murati, të cilat janë sekuestruar nga uniformat blu. Raportohet se gjatë kontrollit të ushtruar në automjetin e blinduar të 40-vjeçarit janë gjetur dy armë zjarri (kallashnikov dhe pistoletë). Më tej, nga kontrolli fizik ndaj Ylli Muratit është konstatuar se mbante dhe 1 radio të lidhur me kanalet e komunikimit të Policisë së Durrësit.
Ndërkohë, në vijim të operacionit “Intervention”, nga kontrolli në banesën e babait të Bajram Roçit është gjetur dhe një armë zjarri pistoletë.
Njëri prej të arrestuarve është me precedent për vjedhje me armë. më Konkretisht bëhet fjalë për Ylli Muratin, i cili është emër i njohur për drejtësinë, pasi ka qenë pjesë e një grabitjeje të 20 mijë eurove në një autobus të linjës Itali-Vlorë, më datë 25 shtator të vitit 2019. Shuma e 20 mijë eurove i përkiste dy udhëtarëve të kësaj linje dhe përveç Ylli Muratit pjesë e grabitjes ishin dhe dy persona të tjerë.
Materialet procedurale i kaluan Prokurorisë së Durrësit për veprime të mëtejshme.
