Atë që përfliej prej dy ditësh, Tirana e ka zyrtarizuar ditën e sotme. Pranimin e dorëheqjes së kërkuar nga trajneri Gugash Magani, teksa përmes një komunikate e falenderonte për kontributin e dhënë tek bardheblutë në këtë rikthim të tretë ndaj tij.
“KF Tirana njofton ndërprerjen e bashkëpunimit me teknikun Magani. Klubi e falenderon për kontributin dhe përkushtimin e tij në drejtimin e stolit bardh e blu dhe i uron suksese në vijim”, njoftoi Tirana.
Por, brenda orës, Tirana ka njofgtuar edhe zyrtarizimin e trajnerit të ri, ku ka kthyer në stol Bledi Shkëmbin, për të vazhduar projektin që kishte nisur në fillim të sezonit.
Klubi shpreh besim në aftësitë e Shkëmbit, i cili është njohës i mirë i lojtarëve dhe i strukturës së skuadrës, dhe shpreson që ai të sjellë rezultatet e shumëpritura nga tifozët.
“Bledi Shkëmbi rikthehet në drejtimin e KF Tirana. Klubi beson në vazhdimësinë e projektit të nisur në fillim të sezonit, duke i’a besuar drejtimin e skuadrës Bledi Shkëmbit, i cili është njohësi më i mirë i kontingjentit aktual në ekip. KF Tirana i uron suksese trajnerit dhe rikthim sa më të shpejtë te rezultatet e shumëpritura nga komuniteti bardheblu.” – njofton klubi.
Gugash Magani dha dorëheqjen pas humbjes turpërueses 0-4 përballë Egnatias, teksa në mesjavë Tirana u eliminua edhe në Kupë nga Bylisi.
Bardheblutë rrezikojnë të bien nga kategoria, teksa deri më tani kanë grumbulluar vetëm 18 pikë në 21 ndeshje, duke arritur të marrin vetëm dy fitore dhe 12 barazime.
