Tirana u eliminua ditën e martë nga Kupa e Shqipërisë dhe sheh një sezon që deri në këto momente mund të quhet si dramatik.
Si të mos mjaftonte vendi i nëntë (parafundit) në Superligë, vetëm dy fitoret këtë sezon dhe 18 pikët e grumbulluara, bardheblutë u përmbysën nga Bylisi në Kupë duke u eliminuar që në fazën e 1/16-ve.
Për këtë në klubin më të titulluar në vend janë duke menduar një ndryshim dhe “kurban” si gjithnjë është posti i trajnerit.
Por trajneri i Tiranës, Gugash Magani në një intervistë të fundit për “Panorama Sport” se ai nuk bëhet barrë për klubin, por nuk jep dorëheqjen. Peqinasi tha se situata është e rëndë, ndërsa pranoi se ka besim te skuadra.
Eliminimi nga Kupa – Eliminimi nga Kupa na mërziti shumë, sepse ne kishim si objektiv edhe kualifikimin në këtë kompeticion. Këto janë ngjarje që ndodhin në futboll. Duhet me qenë shumë i drejtpërdrejtë. Unë mendoj se kam bërë më të mirën për skuadrën dhe do të vazhdoj të drejtoj nëse qëndroj, sepse që të jem i sinqertë unë nuk mund të them se ecuria është e mirë, pasi rezultatet nuk më japin të drejtë.
E ardhmja te Tirana- Nëse unë jam barrë, unë nuk jap dorëheqjen, pasi eliminimi nga kupa nuk është pjesë e kontratës. Në këto momente braktisja ime nuk i bën mirë skuadrës, pasi ajo ndodhet në një moment të vështirë. Mendoj se braktisja do të ishte diçka jo e mirë nga ana ime.
Tirana e parafundit në kampionat- Unë kam besim te skuadra. Kam një detyrim për Tiranën vetëm që të shpëtojmë sezonin, sepse jemi në fund të tabelës. E pashë se edhe mënyra se si u eliminuam, nuk dua t’i hyj fare analizës. Në fund fare, fitues ishte Bylisi që me meritë e kaloi këtë tur. Kemi të gjithë përgjegjësitë tona. Unë kam atë përgjegjësinë kryesore, sigurisht që edhe lojtarët kanë përgjegjësinë e vet, por unë e kam kryesore.
Objektivi për pjesën e kampionatit të mbetur- Kjo skuadër mua më bind edhe pse thashë që rezultatet më japin të drejtë. Kemi disa javë me oshilacione, ku në tre ndeshjet e fundit, ne kemi shënuar të parët, por jemi ndëshkuar. Unë mendoj se është vetëm çështje trysnie dhe presioni. Ka momente ku duhet, që lojtarë të veçantë të bëjnë liderin, por nuk e kanë bërë ose nuk po e bëjnë.
E mira është që ta ruajmë qetësinë mirëpo unë sërish kam besim te skuadra. Skuadra besoj se me ardhjen e dy lojtarëve që sot i patë në fushë, dhe për mua nuk luajtën keq, do të ndryshoj edhe në lojë edhe në rezultate. Nuk më shkon ndërmend, që do të dështojmë, megjithatë siç e theksova dhe më parë rezultatet nuk na japin të drejtë, kështu që normalisht kjo është gjendja./Panoramasport
