Gazeta franceze “Le Parisien” raporton mbi negociatat mes Khvicha Kvaratskhelia dhe PSG-së, duke theksuar se kampionët e Francës synojnë të finalizojnë blerjen e sulmuesit gjeorgjian nga Napoli deri të mërkurën.
Marrëveshja pritet të mbyllet për një shifër që varion nga 65 deri në 75 milionë euro, në varësi të përfshirjes së mundshme të lojtarëve si pjesë e shkëmbimit.
“Drejtuesit e PSG-së dhe Napolit kanë planifikuar të bisedojnë sërish në ditët e para të kësaj jave dhe, sipas një burimi italian, marrëveshja mund të finalizohet që të martën ose të mërkurën, me kusht që asgjë të mos prishë afrimin e arritur midis dy klubeve”. – lajmëron ndër të tjera gazeta franceze.
Pas fitores ndaj Hellas Verona, Antonio Conte, trajneri i Napolit, komentoi situatën e Kvaratskhelia: “Do të doja të nënvizoja diçka, sepse më duket sikur flas në italisht dhe ndoshta në anglisht do të më kuptonin më mirë. Kam folur për zhgënjimin tim, jo ndaj lojtarit ose klubit, por ndaj vetes. Jam zhgënjyer, sepse nuk arrita të ndikoj brenda këtyre gjashtë muajve që diçka të ndryshonte.
Nuk është se Kvara më ka zhgënjyer, ose klubi më ka zhgënjyer. Nuk ia hedh fajin të tjerëve, gjithmonë e marr përgjegjësinë vetë. Mendoja se mund të kisha një ndikim më të madh në këto gjashtë muaj, por e kuptova se jemi ende në pikën ku ishim më parë.
Kam parë disa tituj si ‘Conte i zhgënjyer nga Kvara’, por nuk është e vërtetë. Jam i zhgënjyer nga situata, sepse nuk arrita të ndikoj. Një trajner i një niveli të caktuar ndihmon klubin të marrë vendime, sugjeron lojtarë për t’u blerë. Kur e kuptoj se nuk kam ndikuar, si në këtë rast, është zhgënjimi im.
Është për të ardhur keq, sepse po flasim për një lojtar të fortë dhe të rëndësishëm. Megjithatë, duhet ta kuptojmë realitetin e situatës. Për momentin, Kvaratskhelia është ende një lojtar i Napolit dhe ka ende hapa që duhen bërë nëse dikush dëshiron ta blejë atë. Nuk ka asgjë të sigurt. Do të shohim se çfarë do të ndodhë”.
