Policia ka zhvendosur me karrotrec makinën në të cilën u vra 56-vjeçari Bujar Nasufi, në zonën e “Pallatit me Shigjeta”.
Dyshohet se persona që lëviznin me motor, kanë qëlluar në drejtim të Nasufit duke e lënë të vrarë në vend. Sipas të dhënave, autorët janë larguar me motor drejt zonës së Selitës. Mësohet se ai së bashku me vëllain e tij ishte pronarë i një mobilerie në zonën e “Pallatit me Shigjeta”.
Paraprakisht dyshohet se në momentin që është qëlluar, sapo ka dalë nga biznesi teksa dëshmitarët kanë parë mjetin e viktimës të ndaluar. Raportohet se viktima është qëlluar me 6 plumba, ndërsa besohet se ai ka qenë duke shkuar në banesën e tij, e cila ndodhet pranë vendit të ngjarjes. Deri më tani janë sekuestruar disa kamera në zonë, të cilët dyshohet se mund të kenë fiksuar momentin e atentatit apo lëvizjet e autorit.
