Komisioni i Disiplinës ka bërë të ditur ditën e sotme vendimet e marra së fundmi. Që nga ekipet e Superiores, e deri te futbolli i moshave ka pasur gjoba dhe dënime.
Sulmuesi i Laçit, William Cordeiro është pezulluar me 4 takime për sjellje josportive ndaj zyrtarëve të ndeshjes. Ndërkohë që presidenti i klubit kurbinas, Pashk Laska, për sulm ndaj zyrtarëve në përfundim të ndeshjes Egnatia-Laçi është pezulluar me plot 15 ndeshje, duke mos qenë në ambientet e stadiumit, deri në fund të dënimit.
Nuk kanë munguar edhe gjobat me Bylisin dhe Elbasanin që e kanë pësuar për shkak të sjelljes së tifozëve. Dy klubet e Superiores janë dënuar me nga 50 mijë lekë të reja.
VENDIMET:
AF Elbasani, për sjellje të gabuar të spektatorëve, duke ndezur flakadanë dhe mjete të tjera piroteknike, në bazë të nenit 17/2/c të KDE, dënohet me gjobë në masën 50.000 (pesëdhjetë mijë) lekë.
FK Bylis, për sjellje të gabuar të spektatorëve, duke hedhur sende në fushën e lojës, në bazë të nenit 17/2/b të KDE, dënohet me gjobë në masën 50.000 (pesëdhjetë mijë) lekë.
Lojtari i KF Laçi, Cordeiro Melo William, për sjellje josportive ndaj zyrtarëve të ndeshjes, në bazë të nenit 14/1/j të KDE, dënohet me 4 (katër) ndeshje pezullim nga veprimtaritë.
Zyrtari i KF Laçi, Pashk Laska, për sulm ndaj zyrtarëve të ndeshjes, në bazë të nenit 14/1/l të KDE dënohet me 15 (pesëmbëdhjetë) ndeshje pezullim nga aktiviteti. Në zbatim të nenit 6/2/b të KDE, zyrtarit i ndalohet hyrja në dhomat e zhveshjes dhe ambientet e brendshme të stadiumit, deri në përfundim të dënimit.
Zyrtari i FC Besa, Romeo Bishdili, për sulm ndaj zyrtarëve të ndeshjes, në bazë të nenit 14/1/l të KDE dënohet me 15 (pesëmbëdhjetë) ndeshje pezullim nga aktiviteti. Në zbatim të nenit 6/2/b të KDE, zyrtarit i ndalohet hyrja në dhomat e zhveshjes dhe ambientet e brendshme të stadiumit, deri në përfundim të dënimit.
KF Shkumbini U-19, për braktisjen e ndeshjes së vlefshme të kampionatit Kategoria e Dytë U-19, Zona Rajonale Tiranë, kundër Kamza Sport U-19, në bazë të nenit 16/1 të KDE, dënohet me gjobë në masën 100.000 (njëqind mijë) lekë dhe humbet ndeshjen në tavolinë me rezultatin 3-0. Sipas nenit 76/1/e të KDE, gjoba të aplikohet në masën 3%.Kundër vendimit lejohet ankim brenda 3 (tre) ditëve përpara Komisionit të Apelit.
