Sapo ka fituar Superkupën e Italisë kundër Interit (3-2), por Sérgio Conceição nuk dëshiron që lojtarët e Milanit të dehen nga ky trofe dhe kujtoi situatën e klubit në Serie A:
“Nuk mund të punosh te Milani nëse, pasi fiton një Superkupë, ndihesh i kënaqur ose ‘me barkun plot’. Kjo nuk është e mirë. Milani ka fituar 19 ‘Scudetto’ dhe shtatë Liga të Kampionëve, por jemi 17 pikë larg vendit të parë në renditje. Duke filluar nga nesër, duhet të fillojmë të fitojmë dhe të bindim në kampionat për të përfunduar sa më lart të jetë e mundur. Superkupa tashmë ka kaluar.”
Lidhur me debutimin në kampionat, trajneri portugez u shpreh:”Emocionet nuk ekzistojnë për mua.
Do të ndiej adrenalinën normale të një ndeshjeje dhe do të përpiqem të kuptoj ku ndodhem, që është në një klub historik, por për përgatitjen e sfidës kam shumë gjëra, shumë detaje në mendje për të menduar për emocionin tim. Ndoshta do të ndiej diçka para fillimit të ndeshjes, sepse nuk jam një gur, por mbi të gjitha dua të përgatis mirë djemtë. Jam lideri maksimal i kësaj skuadre dhe marr përgjegjësinë para jush, por të gjithë në grup kanë përgjegjësi.”
“Duhet të vazhdojmë me gjërat e mira që pamë në Riad dhe të mos bjerë forma menjëherë. Duhet të shprehim cilësitë tona dhe të përmirësohemi më tej, sepse kundër Juventusit dhe Interit kemi luajtur keq në disa pjesë të lojës dhe nuk më pëlqeu fare nga djemtë. Për shembull, kundër Interit kishte gabime në presion, në kohën dhe në zonën e duhur për të ushtruar presion… Mënyra për të shijuar një sukses është të mendosh që kemi një tjetër ndeshje përpara. Kërceva dhe u gëzova pas Superkupës. Por tani duhet të përqendrohemi në fitimin e ndeshjes kundër Cagliari-t,” shtoi ai.
Në fund, portugezi foli për merkaton e transferimeve, duke mos komentuar interesimin e pretenduar për Marcus Rashford:
“Do të flasim për merkaton në momentin e duhur. Ndoshta pas ndeshjes me Cagliari-n: ndoshta do të gjejmë një mënyrë për të folur për diçka që është e rëndësishme. Rashford? Është një lojtar i mirë, si shumë të tjerë në merkato. Do të shohim çfarë do të ndodhë.”
