Është zbardhur dëshmia e dhënë për grupin hetimor e 48-vjeçarit Adriatik Roshi, i njohur ndryshe si “Ad Leci”, i cili u dhunua barbarisht më 5 Janar në ambientet e një berberhane në Tiranë nga disa persona të maskuar.
Burime për mediat bëjnë me dije se ai ka deklaruar se nuk ka njohur asnjë prej autorëve që e kanë rrahur me leva hekuri dhe sëpata, pasi ata kanë të maskuar.
Adriatik Roshi ka mohuar që të ketë konflikte me ndonjë person, teksa burime bëjnë me dije se kur ai është pyetur në lidhje me sherrin e regjistruar gjatë verës në Palasë ka refuzuar të japë komente.
48-vjeçari vijon të jetë ende në spitalin e Traumës në Tiranë, ku ka thyerje kockash pothuajse në të gjithë trupin nga koka tek këmbët.
Nga hetimet rezultoi se organizatori i këtij krimi është biznesmi Artur Koçeku alias Luçiano Koçeku, i cili njihet si Tur Koçeku. Ai është shpallur në kërkim si autor i ngjarjes së bashku me tre të afërm të tij, ndërsa nipi i tij dhe një i afërm tjetër janë arrestuar.
Mësohet se Policia po vijon kontrollet për kapjen e 4 personave të shpallur në kërkim, teksa biznesmni Artur Koçeku dyshohet se është arratisur në Dubai dhe autoritetet kanë kontaktuar me autoritetet e Emirateve të Bashkuara Arabe.
Kujtojmë se e gjithë dhuna është filmuar nga kamerat e sigurisë të berberhanes ku ndodhi ngjarja, e ndodhur në rrugën “29 Nëntori”, pranë kryqëzimit tek ish-“Shqiponja”.
Nga pamjet dukej se në berberhane futeshin 4 persona të maskuar dhe të “armatosur” me shufra hekuri dhe sëpata, teksa dy tjerë kanë qëndruar roje tek dera. Ata tërheqin zvarrë biznesmenin Adriatik Roshi, i cili ishte duke pritur në radhë dhe pasi e shtrijnë në tokë, fillojnë ta godasin me shufra hekuri, sëpatë dhe sende të tjera.
Policia arrestoi shtetasit: Gani Koçeku, 24 vjeç dhe Ledio Tusha, 31 vjeç (Nipi i Tur Koçekut). Ndërkohë, në kërkim janë shpallur shtetasit Ronald Koçeku, Luçiano (Artur) Koçeku, Gëzim Koçeku dhe Dino (Abedin) Koçeku. Gjatë kontrollit të ushtruar në banesat e tyre, uniformat blu gjetën dhe sekuestruan një armë zjarri pistoletë, me leje në banesën e Ledio Tushajt, si dhe një armë gjahu në banesën e Dino (Abedin) Koçekut.
Kjo ngjarje dyshohet se ka lidhje me sherrin në Palasë, të regjistruar më 24 gusht të 2024-ës, ku Luçiano (Artur) Koçeku u sulmua dhe u plagos rëndë në një lokal të një prej resorteve më të njohura në bregdetin e jugut. Rrahja e Adriatik Roshit dyshohet se mund të jetë si shenjë hakmarrje për ngjarjen e gushtit në jug të Shqipërisë, megjithatë ende nuk faktohet nëse Adriatik Roshi ka qenë pjesë e sherrit në Palasë.
Një shishe shampanjë dyshohet të ketë qenë zanafilla e sherrit në resortin luksoz mbrëmjen e 25 gushtit në Palasë, ku po këndonte këngëtari grek Kostandinos Argios dhe Adriatik Roshi dyshohet të jetë konfliktuar dhunshëm me Tur Koçekun, pamje që u bënë virale në rrjetet sociale.
Në reagimet zyrtare që bëri Policia në atë kohë, nuk përmendej emri i Adriatik Roshit, pasi disa persona nuk arritën të identifikoheshin, por ngjarja e ndodhur më 5 janar në Tiranë dyshohet të jetë një shenjë hakmarrje për konfliktin në Palasë.
Adriatik Roshi njihet si miku i Fatmir Bejos, një personazh i shpallur në kërkim nga Policia për dy ngjarje kriminale të ndodhura në Tiranë dhe ngjarjen e sherrit të Palasës.
