Telefonata e një vajze në sallën operative të Policisë së Shtetit, rreth orës 14:00 se ishte dhunuar nga disa persona brenda një apartamenti, ka alarmuar autoritetet, ku Forcat e Ndërhyrjes së Shpejtë, “Shqiponjat” dhe ato RENEA blinduan zonën e Astirit në Tiranë, pasi dyshohej se mos ishim para një rasti rrëmbimi.
Më konkretisht, bëhej fjalë për një aprtament në katin e tetë të një pallat të ndërtuar në vitet e fundit i ndodhur buzë rrugë “Teodor Keko”, pranë mbikalimit në Unazën e Madhe në Astir.
Por, kur uniformat blu mbërritën në vendin e ngjarjes, vajza Sejma Q. nga Elbasani, nuk pranoi ta hapte derën, madje edhe pas negociatave me prindërit e saj, të cilët shkuan në ndihmë të Policisë.
Kjo solli që forcat RENEA të ndërhynin nga ajri, ku u lëshuan me litar nga tarraca e pallatit dhe u futën që nga ballkoni dhe dritarja e apartamentit dhe më pas hapën derën. Vajza është konstatuar e vetme në apartament në gjendje të rënduar psikologjike, teksa sipas Policisë së Tiranës, nga kqyrja fizike nuk janë konstatuar shenja dhune.
Uniformat blu kanë ushtruar kontroll edhe në një apartament përballë apartamentit ku ndodhej vajza e ngujuar dhe aty kanë gjetur dy armë zjarri pistoletë. Burime për mediat bëjnë me dije se dhe sipër tavolinës janë konstatuar mbetje lënde narkotike kokainë.
Të dy apartamentet ishin marrë me qira nga i dashuri i vajzës së ngujuar, por uniformat blu nuk kanë konstatuar person tjetër brenda banesat, përveç saj.
“Në vijim të informacionit të dhënë pak më parë, ju informojnë se: Rreth orës 14:10, u bë hapja e derës së banesës nga Forcat “Renea”, nuk pati probleme. Shtetasja S.Q, ndodhet nën asistencën e stafit mjekësor. Nga këqyrja paraprake nuk konstatohen shenja të dukshme fizike. Gjithashtu, gjatë kryerjes së veprimeve të ngutshme hetimore dhe kontrollit të apartamenteve të tjera në pallatin në fjalë, në një banesë tjetër janë gjetur 2 armë zjarri pistoletë. Brenda kësaj banese nuk janë gjetur persona në momentin e kontrollit. Grupi hetimor po kryen veprimet përkatëse me qëllim zbardhjen e plotë të ngjarjes dhe identifikimin e poseduesit të armëve.” – thuhet në njoftimin e Policisë së Tiranës.
Banorët e zonë pretendojnë se para se të mbërrinte Policia kishin dëgjuar dhe një zhurmë, si të shtëne me armë zjarri, por kjo gjë mbetet për t’u provuar.
Vajza nga Elbasani kishte disa ditë që ishte larguar nga banesa dhe babai i saj kishte denoncuar se ishte rrëmbyer nga i dashuri i saj, por dyshohet se ajo ishte larguar me dëshirën e saj.
Policia vijon punën për zbardhjen e plotë të rrethanave të ngjarjes dhe lokalizimin e të dashurit të saj, teksa mësohet se janë sekuestruar pamjet filmike të kamerave të sigurisë në pallat.
