Gjykata e Malagas, Spanjë, ka dënuar me gjashtë muaj burg një modele që kishte akuzuar Theo Hernández-in, futbollist i Milanit, për sulm seksual, në një çështje që daton nga vera e vitit 2017.
Luisa Kremleva u dënua për krimin e akuzës dhe denoncimit të rremë dhe do të duhet të paguajë dhjetë euro në ditë për gjashtë muaj, sipas vendimit që agjencia e lajmeve EFE ka arritur të sigurojë.
E akuzuara arriti një marrëveshje duke pranuar faktet e përshkruara në akuzën e Prokurorisë Publike dhe zbatimi i dënimit me gjashtë muaj burg është pezulluar për një periudhë prej dy vitesh, me kusht që të mos kryejë ndonjë krim gjatë kësaj kohe.
Në verën e vitit 2017, Kremleva kishte deklaruar se futbollisti kishte tentuar të kryente marrëdhënie seksuale pa pëlqimin e saj në parkimin e një diskoteke në Marbella dhe se, kur ajo kishte refuzuar, ishte sulmuar nga ai.
Megjithatë, në janar të vitit 2019, gjykata hodhi poshtë padinë duke u bazuar në ekzistencën e “kundërthënieve të qarta” në dëshminë e saj. Për më tepër, kamerat e sigurisë në parkimin e diskotekës nuk tregonin asnjë sulm, por vetëm një rrëzim, dhe u konstatua gjithashtu se pas ngjarjes së pretenduar, modelja ruse ishte kthyer normalisht në diskotekë.
