Groenlanda mund të bëhet e pavarur nëse banorët e saj duan, por nuk do të bëhet një shtet i SHBA-së, tha të mërkurën ministri i jashtëm i Danimarkës, pasi presidenti i sapozgjedhur i SHBA-së, Donald Trump refuzoi të përjashtonte forcën për të marrë kontrollin e Ishullit Arktik.
Udhëheqësi i Grenlandës zhvilloi bisedime të mërkurën me mbretin danez në Kopenhagë, një ditë pasi komentet e Trump e vendosën fatin e ishullit të sunduar nga danezët, në krye të titujve botërorë.
Trump, i cili merr detyrën më 20 janar, tha të martën se nuk do të përjashtonte përdorimin e veprimeve ushtarake apo ekonomike për ta bërë Grenlandën pjesë të Shteteve të Bashkuara. Në të njëjtën ditë, djali i madh i Trump, Donald Trump Jr., bëri një vizitë private në Grenlandë.
“Ne e pranojmë plotësisht se Groenlanda ka ambiciet e veta. Nëse ato materializohen, Grenlanda do të bëhet e pavarur, megjithëse vështirë me një ambicie për t’u bërë një shtet federal në Shtetet e Bashkuara,” tha ministri i jashtëm danez, Lars Lokke Rasmussen.
Ai u tha gazetarëve se shqetësimet e shtuara të sigurisë së Shteteve të Bashkuara në Arktik, ishin legjitime pas rritjes së aktivitetit rus dhe kinez në rajon.
“Unë nuk mendoj se jemi në një krizë të politikës së jashtme,” tha ai. “Ne jemi të hapur për një dialog me amerikanët se si ne mund të bashkëpunojmë edhe më ngushtë për të siguruar që ambiciet amerikane të përmbushen.”
Megjithatë, megjithëse vetë Danimarka e hodhi poshtë seriozitetin e kërcënimit të Trump për territorin e saj, ambicia e deklaruar hapur e presidentit të rikthyer për të zgjeruar kufijtë e SHBA-së, ka tronditur aleatët evropianë, më pak se dy javë para se të marrë detyrën.
Ministri i Jashtëm i Francës, Jean-Noel Barrot, tha se Evropa nuk do t’i lejonte vendet e tjera të sulmonin kufijtë e saj sovranë, megjithëse ai nuk besonte se SHBA do të pushtonte. Një zëdhënës i qeverisë gjermane tha se Berlini i qëndronte parimit se kufijtë, nuk duhet të ndryshohen me forcë. Një zëdhënës i Komisionit Evropian tha se sovraniteti i vendeve anëtare të BE-së, duhet të respektohet./ Reuters.
