Pas vendimit të Gjykatës Kushtetuese për SkyECC ka nisur gjykimi në themel në GJKKO për dosjen ‘Metamorfoza”.
Në seancën e parë që është zhvilluar ditën e sotme mësohet se nuk është paraqitur biznesmeni Pëllumb Gjoka, i cili është i arrestuar në kuadër të operacionit “Metamorfoza”.
Ndërkohë, avokatët e Pëllumb Gjokës kërkuan të shtyhet në afatin maksimal për të pritur dhe zbardhjen e vendimit të Gjykatës Kushtetuese. Seanca e ardhshme u la më datë 21 janar.
Kreu i SPAK, Altin Dumani ka kërkuar vijimin e shqyrtimit gjyqësor dhe viktimat e veprës penale të quhen të njoftuar pasi gjykata ka ezauruar rrugën ligjore. Avokati i ish-shefit te policisë Adrit Hasanbegaj kërkon shtyrje të seancës për shkaqe proceduriale për të patur kontakt me klientin dhe një mbrojtje efektive. Avokatët e Pëllumb Gjokës, Ylli Manjani dhe Gurali Brahimllari kërkojnë të shtyhet gjyqi në afatin maksimal për të pritur dhe zbardhjen e vendimit te Gjykatës Kushtetuese.
Pëllumb Gjoka, u arrestua në korrik 2023 si anëtar i dyshuar i një organizate kriminale që kishte kryer ndër të tjera vrasje dhe pengmarrje. Ai është pronar i kompanisë “Imperial Group”, me aktivitet në fushën e investimeve në turizëm dhe në lojërat e fatit krahas bizneseve të tjera.
Në vitin 2021, qeveria shqiptare i dha kësaj kompanie statusin e investitorit strategjik për projektin Silver Sand Resort, një projekt masiv që duhet të shtrihet në një sipërfaqe prej 113 mijë metra katrorë për ndërtimin e pallateve, vilave dhe hoteleve. Sipas dokumenteve të publikuara, vlera e planifikuar e investimit ishte 52 milionë euro, nga të cilat, një pjesë do të financohej nga shitja gjatë ndërtimit të apartamenteve dhe vilave.
Hetimi ndaj Gjokës filloi pas mbërritjes së një dosjeje nga Franca. Ndaj tij dhe anëtarëve të tjerë të grupit ka nëntë lloj akuzash për vepra penale, mes të cilave vrasje, korrupsion aktiv e pastrim parash, të kryera në kuadër të grupit të struktuar kriminal. Ndërsa zyrtarët e arrestuar si pjesë e organizatës akuzohen për korrupsion, zbulim të akteve apo të dhënave sekrete, si dhe për sigurimin e kushteve dhe mjeteve për të kryer vrasje.
