Nuk është vetëm Real Madridi në kërkim të vazhdueshëm për përforcime të reja, për të qenë gjithmonë konkurrues me kalimin e kohës. Ekziston gjithashtu një listë e gjerë lojtarësh që, përmes agjentëve ose ndërmjetësve të tyre, i ofrohen drejtpërdrejt klubit spanjoll. Ky është rasti i Virgil van Dijk, mbrojtës qendror dhe kapiten e Liverpool-it, kontrata e të cilit përfundon në fund të sezonit.
Sipas lajmit të bujshëm të publikuar nga gazetarët spanjollë të Relevo-s, agjentët e holandezit 33-vjeçar kanë kontaktuar me drejtuesit e Real Madrid-it për t’u komunikuar atyre gatishmërinë e mbrojtësit për t’u transferuar te “Los Blancos” duke filluar nga vera e vitit 2025.
Megjithëse Carlo Ancelotti ka nevojë për një përforcim në mbrojtje (me Militao jashtë dhe Alaba-n në dyshim) propozimi u refuzua nga drejtuesit madrilenë. Arsyeja? Natyrisht, nuk lidhet me çmimin e kartonit, pasi Van Dijk do të vinte si lojtar i lirë në qershor. Thjesht, ai nuk përputhet me profilin që më së miri u përgjigjet nevojave aktuale të ekipit, për shkak të moshës dhe kushteve fizike.
Kjo reflekton qartë drejtimin e marrë nga klubi dhe gjithashtu besimin e shfaqur tek lojtarët që tashmë janë pjesë e skuadrës. Nga Rudiger te Militao, që po rikuperohet nga dëmtimi i ligamentit të kryqëzuar të përparmë, dhe Alaba, për të cilin ka optimizëm.
Po ashtu, edhe i riu Raul Asencio ka treguar potencialin për t’u bërë pjesë e ekipit të parë, për të mos përmendur aftësinë e Tchouamen-it për t’u përshtatur në rolin e mbrojtësit.
