Më 20 Dhjetor 2024 emisioni “Stop” transmetoi denoncimin e zonjës Vjollca Faja, e cila u drejtua në redaksinë e “Stop”, pasi në vitin 2014 ka fituar gjyqin për një pronë dhe nga ky vit vendimi nuk është ekzekutuar.
Në muajin Mars nëpërmjet një personi, takohet me avokatin Bledar Paheshti, i cili në fillim u prezantua si përmbarues e më pas avokat dhe firmosi një kontratë, sipas të cilës ai merrte përsipër të ekzekutonte vendimin e gjykatës.
Për këtë avokati kërkoi 20 mijë Euro. Në fillim do të kryhej pagesa 10 mijë Euro, të cilën qytetarja e kreu dhe po priste ekzekutimin e vendimit. Avokati filloi ta sorollaste, derisa u zhduk e ndryshoi dhe numrat e kontaktit. Nga mesazhet mes avokatit dhe klientes duket se mbrojtësi ligjor e ka shtyrë vazhdimisht vendimin për javën tjetër, pa e ekzekutuar kurrë.
Vjollca telefonon ndërmjetësen, që e lidhi me avokatin Paheshti, por ajo tërhiqet duke mos marrë asgjë përsipër.
Nga informacionet e “Stop”, rezultonte se në momentin e nënshkrimit të kontratës, avokati Paheshti nuk ka pasur licensë, pasi ka qenë i pezulluar nga Dhoma e Avokatisë.
Disa ditë pas këtij transmetimi, Vjollca Faja thotë se është kontaktuar nga ndërmjetësja dhe ka marrë paratë, falë emisionit “Stop”.
“Një javë më vonë u krye. Falenderoj shumë “Stop-in” për gjithë punën e mirë që bëni dhe u krye shumë shpejt. Ndërmjetësja më mori në telefon dhe më tha “hajde të marrësh paratë”. Falenderoj nga zemra të gjithë sepse ishte diçka shumë e shpejtë dhe nuk e prisnim. Shpresoj që të bëni punë të tjera të mira. Faleminderit shumë”, tha Vjollca Faja./tvklan
