Shqipëria duhet që njëkohësisht me zgjerimin e kapaciteteve transmetuese ndërkufitare të shtojë edhe kapacitetet brenda vendit për t’ju përgjigjur investimeve dinamike që po kryhen në energjitë e rinovueshme.
Një raport i Sekretariatit të Komunitetit të Energjisë, i publikuar pak ditë më parë nën titullin “Marrëveshjet e Blerjes së Energjisë së Rinovueshme në Komunitetin e Energjisë”, nënvizon pikërisht këtë aspekt duke theksuar se një rrjet i besueshëm i shërben investimeve që po kryhen dhe rrit besimin e investitorëve.
Raporti ndalet ne një sërë elementesh të marrëveshjeve të blerjes së energjisë në vendin tonë por sa i takon infrastrukturës së transmetimit duke u ndalur tek OST raporti shpreh se ka disa projekte të rëndësishme që janë zbatuar ose do të zbatohen.
“Projektet e modernizimit përfshijnë kontrollin e pajisjeve nga qendrat e dispeçimit, duke mundësuar operacione jo manuale me sistemet SCADA dhe ekzekutimin e veprimit me video kontroll.
Këto projekte nxjerrin në pah angazhimin e Shqipërisë për të përmirësuar infrastrukturën e saj energjetike, duke u përmirësuar besueshmërinë e rrjetit dhe përmbushjen e kërkesës në rritje për energji, të gjitha këto duke rritur përqindjen e energjisë së rinovueshme në portofolin kombëtar të energjisë.
Megjithëse përmirësimet thelbësore dhe ndërtimet e reja të OST në projekte 400/220/110 kV Fier dhe ndërlidhjet me Maqedoninë e Veriut, Kosovën dhe Greqinë janë planifikuar, rrjeti ekzistues mund të përballet me sfida në aspektin e kapacitetit dhe gatishmërisë teknologjike për të trajtuar energjitë e rinovueshme” thuhet në raport.
Sekretariati nënvizon se këto sfida mund të ndikojnë ndjeshëm në zbatimin e Marrëveshjeve të Blerjes së Energjisë Elektrike (PPA). PPA-të sipas tij mbështeten në integrimin e vazhdueshëm të energjive të rinovueshme në rrjet për të ofruar një kthim më të sigurt nga investimi.
“Nëse rrjetit i mungon kapaciteti ose avancimi teknologjik për të menaxhuar ndryshueshmërinë e energjive të rinivueshme në mënyrë efektive, kjo mund çojnë në probleme që lidhen me besueshmërinë. Kjo mund të pengojë investitorët, pasi PPA-të shpesh varen nga prodhimi i parashikueshëm dhe i qëndrueshëm i energjisë për të siguruar qëndrueshmëri financiare dhe përmbushje kontraktuale.
Kështu, përmirësimi i infrastrukturës fizike krahas teknologjive të avancuara të menaxhimit të rrjetit është vendimtar për të zbutur ndryshueshmërinë dhe për të siguruar besueshmërinë e nevojshme për zbatimin efektiv të PPA-së” vlerëson Sekretariati./ Monitor.al
