Cole Palmer ka peshuar shanset e Chelsea për titull, pasi ata pësuan një humbje shokuese 2- 1 në shtëpi nga Fulhami në “Boxing Day”.
Blutë kaluan në epërsi përmes Palmerit, por u befasuan nga dy golat e vonë të miqve, me Herri Uillsonin dhe Rodrigo Munjizin që shënuan në minutat e fundit për skuadrën e Marko Silvës. Përpara përballjes së tyre kundër Evertonit fundjavën e kaluar, Blutë ishin vetëm dy pikë pas kryesuesve të ligës, Liverpulit. Megjithatë, tani ata janë shtatë pikë larg kreut. Ndërsa shumë kishin sugjeruar se Çelsi ishte në fakt në garën për titull, ylli i Enco Mareskës këmbëngul se ata nuk janë pretendentë për titull pas humbjes së tyre.
Ai i tha “Amazon Prime”: “Të humbasësh në fund është e vështirë. Në pjesën e parë luajtëm mirë, kontrolluam lojën dhe patëm disa raste. Në pjesën e dytë humbëm pak kontrollin. Ata janë një ekip i mirë tranzicioni dhe direkt. Ne u zumë në befasi në lojën e tyre dhe paguam çmimin. Ne e kthyem atë në një lojë në të cilën ata janë më të mirë se ne. Por është Ok, kemi një ndeshje tjetër pas disa ditësh. Duhet të vazhdojmë të shohim përpara. E dinim se nuk do të fitonim çdo ndeshje që do të luanim. Të gjithë thanë që në fillim se ne nuk jemi pretendentë për titull. Menaxheri tha se ishte një mundësi për të mësuar, ne do ta analizojmë ndeshjen, do të pushojmë dhe do të rikuperohemi. Është futboll dhe ndodh. Humbëm kontrollin për 20 minuta dhe ata shënuan dy gola, kështu që bravo Fulhami”.
Përpara derbit të Londrës, trajneri i Çelsit, Enco Mareska, pohoi çuditërisht se as superylli i Anglisë nuk është i sigurt nga ulja në stol. Sado e çuditshme që tingëllon, duke pasur parasysh besueshmërinë e Palmerit që nga nënshkrimi për 42.5 milionë paund nga Mançester Siti dhe aftësinë e tij për t’u kthyer menjëherë në një kampion në “Stamford Bridge”, disa tifozë kërkojnë që Zhoao Feliks të ketë më shumë shanse sesa 22-vjeçari.
I pyetur nëse Palmer do të luante gjithmonë titullar, duke qenë se ai ka nisur çdo ndeshje të Premier Ligës nën drejtimin e tij, Mareska tha: “Unë e marr vendimin ndeshje pas ndeshje. Janë golat dhe asistet e tij dhe mënyra sesi po na ndihmon. Ai dhe Nikolas (Xhekson), jo vetëm që po shënojnë gola, por po ndihmojnë me mënyrën se si ne ushtrojmë presing dhe intensitetin tonë”.
