Njësoj siç vepron në 356 ditë të vitit, kryeministri Edi Rama vazhdon të sulmojë mediat.
Kjo ka ndodhur edhe gjatë takimit të fundvitit me gazetarët, ku kreu i qeverisë filloi të bëjë fajtor mediat të cilat hodhën dritë dhe kishin një “rol” kryesor për dy vrasje të rënda që tronditën opinionin publik.
Njësoj siç ndodh me një vend të denjë komunist, kryeministri kalon çdo kompetencë madje arrin që të zbardhë dy ngjarje të komplikuara kriminale, ashtu siç është rasti i Egli Progës dhe Martin Canit.
Në këto krime media me transparencë përcolli çdo dëshmi apo tentativë të policisë dhe organeve të tjera për të manipuluar dhe fshehur autorët.
Teksa merr rolin e hetuesit, Rama pretendon se ai ka zbardhur këto dy vrasje të cilat i etiketoi si “spektakël”.
“Mbyllim vitin me numrin më të ulët të vrasjeve. E kemi nisur me një vrasje në 3 ditë kur morëm detyrën dhe kemi ardhur duke e ulur, por jeta mediatike dhe politike kanë nevojë për të vrarë dhe spektakël. Këtë vit ka pasur dy spektakle që për nga intensiteti dhe manipulimi i publikut kanë qenë për t’u lavdëruar. Por, në raport me të vërtetën u tregua se si gënjehet publiku. Spektakli i pas vrasjes në Pogradec, që u karakterizua nga sajesa pas sajesash në aspektin e integritetit të shërbimit ndaj publikut, duke nisur nga politikanët e pastaj o burra kush flet më shumë në drejtim të gabuar. Spektakli tjetër, edhe më i shëmtuar, ka qenë ai me 14-vjeçarin. U sajuan vrasës të tjerë, u sajuan edhe thika të tjera, u treguan versione kriminale. Unë e quaj kriminale që në kushtet e atyre emocioneve për humbjen e një jete aq të re, ti të furnizosh publikun me helm. T’i thuash publikut që policia ka fshehur një vrasës tjetër, që vrasësi tjetër është djali i një hetuesi të BKH-së dhe për këtë arsye e kanë fshehur. Ky është krim moral. Bëhet fjalë për dy raste, dy të vdekur që u rivranë disa herë”, tha Rama.
