Ish-presidenti amerikan Bill Clinton është shtruar në një spital pas etheve të vazhdueshme, sipas një zëdhënësi të demokratit.
Sipas zëdhënësit të tij, Bill Clinton u shtrua në Qendrën Mjekësore të Universitetit Georgetoën në Uashington, DC të hënën në mbrëmje për analiza dhe vëzhgim pas zhvillimit të etheve.
“Ai mbetet në humor të mirë dhe vlerëson thellësisht kujdesin e shkëlqyer që po merr,” shkroi Angel Ureña në X.
Zëdhënësi nuk dha më shumë detaje mbi gjendjen e demokratit nga Arkansas, megjithëse raportet e mediave amerikane tregojnë se Clinton pritet të shërohet shpejt.
Një burim i afërt me Clinton tha për NBC News se situata “nuk është serioze” dhe ish-presidenti do të ishte “mirë”.
Clinton, 78 vjeç, u shtrua për herë të fundit në spital për gjashtë ditë në vitin 2021 në Kaliforni pasi zhvilloi një infeksion në gjak.
Presidenti i 42-të të SHBA-së, i cili shërbeu në Shtëpinë e Bardhë nga viti 1993 deri në 2001, ka vuajtur me probleme të zemrës në të kaluarën.
Dihet gjithashtu se në vitin 2004, në moshën 58-vjeçare, bëri një operacion të katërfishtë bajpas pasi mjekët gjetën shenja të sëmundjes së gjerë të zemrës dhe, dhjetë vjet më vonë, atij iu hap një arterie e bllokuar pasi u ankua për dhimbje gjoksi.
Jo shumë kohë pas operacionit të tij të dytë, ish-presidenti – i njohur për dashurinë e tij ndaj ushqimeve të yndyrshme, u bë vegan. Ai i tha Politico-s në vitin 2016, “Unë mund të mos isha këtu nëse nuk do të isha bërë vegan”.
Clinton ishte aktiv në fushatën presidenciale këtë vit, teksa udhëtoi në vend për të nxitur fushatën e Zëvendës Presidentes Kamala Harris për presidente.
Muajin e kaluar, ai publikoi librin e tij të fundit, Qytetari: Jeta ime pas Shtëpisë së Bardhë.
