Gjykata e Posaçme e Apelit shqyrton sot ankimimet e bëra nga Ajola Xoxa dhe Arbër Veliaj, bashkëshortja dhe vëllai i kryebashkiakut të Tiranës, Erion Veliaj.
Ata kanë depozituar një padi, ku kundërshtojnë veprimet e SPAK dhe GJKKO, në lidhje me kontrollin e ushtruar mëngjesin e 6 Dhjetorit nga BKH ë banesat e tyre dhe të familjarëve, si dhe në zyrat e fondacionit “Harabel”.
Avokatët e Ajola Xoxës dhe Arbër Veliajt pretendojnë që kontrollet janë bërë në shkelje të ligjit procedurial për mungesë shkaku të ligjshëm. Gjyqtarja që do të marrë vendim mbi këtë ankimim në Apel është Ilirjana Olldashi.
Kreu i Bashkisë së Tiranës, Erion Veliaj në një reagim mbi hetimet e SPAK ndaj tij theksoi se agjentët e BKH-së kishin trokitur në derën e banesës së tij pa një vendim gjyqësor.
Ndërkohë, një ditë më parë, Ajola Xoxa dha shpjegime për rreth 3 orë në SPAK për llogari të një hetimi për “korrupsion” dhe hetim pasuror të nisur nga kjo strukturë.
Pak ditë më parë, GJKKO refuzoi kërkesën e saj dhe vëllait të kryebashkiakut, Arbër Veliaj, për t’ju kthyer sendet e sekuestruara nga SPAK gjatë kontrollit personal dhe disa ambienteve në pronësi të tyre.
