Gjykata e Posaçme ka kërkuar që t’i rëndojë pozitat ish-ministrit të Shëndetësisë, Ilir Beqaj në lidhje me dosjen e koncesionit abuziv të sterilizimit.
Në seancën që po zhvillohet ditën e sotme, gjyqtarja Flojera Davidhi i ka kërkuar SPAK-ut që të rikualifikojë akuzon për Ilir Beqajn, ish zëvendësministrin Klodian Rjepaj dhe biznesmenin Ilir Rrapaj, duke i akuzuar për vjedhje duke shpërdoruar detyrën në kuadër të grupit të strukturuar kriminal.
Kjo është një akuzë më e rëndë nga ajo që kishte ngritur SPAK në përfundim të hetimeve paraprake dhe dërgimit të dosjes për gjykim. SPAK e akuzonte Beqajn vetëm për veprën penale “shp;rdorim detyre”, ndërsa Rjepajt dhe Rrapajt dosja kishte akuzën e “mashtrimit me pasoja të rënda në bashkëpunim”.
Burime bëjnë me dije se gjyqtarja Flojera Davidhi ka kërkuar dhe veçim të dosjes dhe vazhdim të hetimeve nga SPAK për të saktësuar rolin e Ministrisë së Financave në dosjen e Sterilizimit, ku ministra në detyrë kanë qenë Shkëlqim Cani dhe Arben Ahmetaj.
Gjithashtu, sipas GJKKO-së duhet të hetohet dhe shtetasi italian Umberto Stachini, që është një nga nënkontraktorët e shoqërive.
Mësohet se prokurorët e çështjes Edvin Kondili dhe Ened Nakuçi kanë pranuar të ngrenë akuzat ashtu siç i sugjeron GJKKO, pavarësisht se kanë deklaruar se akuzat e ngritura prej SPAK-ut mendojnë se ishin të drejta.
Pasi kërkuan 30 minuta kohë, prokurorët e çështjes vendosën që të pranonin kërkesat e gjyqtares Flojera Davidhi.
Burime bëjnë me dije se në momentin kur biznesmeni Ilir Rrapaj ka marrë vesh se do të akuzohet për grup kiriminal ka humbur ndjenjat në sallën e gjyqit.
Ndërkohë, Ilir Beqaj ka “shpërthyer” në gjyq, duke u drejtuar gjyqtares dhe prokurorëve se ku janë lekët që ai pretendohet se i ka vjedhur. Ish-ministri i Shëndetësisë ka kërkuar të specifikohet shuma e vjedhur “meqë ka akuzë për vjedhje”.
Seanca është shtyrë për më 9 Janar, me kërkesë të avokatëve të cilët kanë kërkuar më shumë kohë për të paraqitur konkluzionet. Më 9 janar, gjyqtarja Flojera Davidhi do të vendosë nëse do e dërgojë dosjen për gjykim ose jo.
Kujtojmë se hetimet gati 3-vjeçare të kryera nga SPAK kanë zbuluar shkelje të ligjit në procedurat e dhënies së njërit prej koncesioneve më të kushtueshme të sektorit të shëndetësisë, me qëllimin e vetëm të shpalljes fitues të kompanisë së Ilir Rrapajt dhe shtetasit Italian, Umbro Staccini.
Referuar hetimeve, vlera e koncesionit që llogaritet rreth 100 milionë euro, është fryrë fiktivisht dhe dhjetëra milionë euro. Para që deri më tani, prokuroria nuk e ka zbuluar se në xhepat e kujt kanë shkuar.
Në lidhje me këtë dosje, SPAK lëshoi urdhër-arreste vetëm Klodjan Rrjepajn dhe Ilir Rrapajn në Gushtin e vitit të kaluar, por Ilir Beqaj u arrestua më vonë.
Ai u vu në pranga në fillim të muajit korrik në lidhje me abuzimin me fondet e Bashkimit Europian gjatë kohës që ish-ministri drejtonte Agjencinë Shtetërore të Programimit Strategjik dhe Koordinimit të Ndihmës (SASPAC).
Beqaj dyshohet se përmes njerëzve të besuar ka ndërtuar një skemë për të përfituar shuma të mëdha parash duke lëshuar fatura fiktive për shërbime të pakryera, të lëshuara nga biznese të ndryshme në Tiranë.
Gjithashtu, ai akuzohet edhe për fshehje pasurie, pasi dyshohet se është pronari “faktik” i restorantit “Gzona” tek Kalaja e Tiranës, si dhe i një automjeti që e ka në emër të bashkëpunëtorit të tij, po ashtu në burg, Ermal Kurtulaj.
