Është zbardhur identiteti i personi që u gjet pa shenja jete mbrëmjen e kësaj të diele në banesën e tij në lagjen “10 Korriku” në qytetin e Vlorës.
Burime bëjnë me dije se viktima është shtetasi Bashkim Durmishi, rreth 68 vjeç, i cili dyshohet se është dhunuar për vdekje. Mësohet se ai ka patur dëmtime në nofull, ku dyshohet se është goditur me send të fortë.
Gjithashtu, burime bëjnë me dije se ai është gjetur edhe i gjysmë i zhveshur, teksa nga kqyrja e vendit të ngjarjes, grupi hetimor dyshon se i moshuari ka qenë pre e një grabitjeje. Dyshohet se pas grabitjes, 68-vjeçari është vrarë.
Gjithsesi, pavarësisht dëmtimeve në nofull, Policia e Vlorës thotë se paraprakisht, dyshohet se 68-vjeçari ka pësuar arrest kardiak.
Autoritetet, përmes një komunikate për mediat bën me dije se trupi i viktimës do të transportohet në morg për ekspertizë mjekoligjore, për të përcaktuar saktësisht shkaqet e dëmtimit të konstatuar në fytyrë dhe të vdekjes.
Policia ndodhet në vendin e ngjarjes, ku po heton për zbardhjen e plotë të rrethanave të rastit në fjalë dhe identifikimin e autorit/autorëve nëse kemi të bëjmë me një vrasje.
Gjithashtu, jo vetëm nga ngjarja e sotme, por edhe nga ngjarjet e fundit kriminale në vend, Forcat e Sigurisë Kombëtare të Policisë së Shtetit kanë ngritur një post-bllok në dalje të Vlorës dhe janë duke ushtruar kontroll automjeteve të dyshimta.
Pritet një komunikatë për mediat nga ana e Policisë së Vlorës për të dhënë më shumë detaje për ngjarjen e sotme nlë qytetin bregdetar.
Njoftimi:
Sot, rreth orës 19:02, në lagjen “10 Korriku”, Vlorë, është gjetur pa shenja jete në banesën e tij shtetasi B.D., 68 vjeç. Paraprakisht, dyshohet se 68-vjeçari ka pësuar arrest kardiak.
Trupi i 68-vjeçarit do të transportohet në morg për ekspertizë mjekoligjore, për të përcaktuar saktësisht shkaqet e dëmtimit të konstatuar në fytyrë dhe të vdekjes.
Grupi hetimor, nën drejtimin e Prokurorisë, po punon për sqarimin e plotë të rrethanave të kësaj ngjarjeje.
