Janë zbardhur detaje të reja nga shpërthimi me tritol i regjistruar mbrëmjen e djeshme në Tiranë, në një apartament në katin e 9-të të një pallati. Ngjarja ndodhi rreth orës 23:45 minuta në rrugën “Sadik Petrela”.
Kanë qenë banorët e pallatit, të cilët të alarmuar nga shpërthimi i fortë, kanë njoftuar Policinë, ku këta të fundit, pasi kanë mbërritur në vendin e ngjarjes, kanë hapur me forcë derën dhe kanë konstatuar xhamin dhe vetratat e ballkonit të dëmtuara.
Për shkak të lartësisë (kati i 9-të), dyshohet se tritoli mund të jetë hedhur me dron në ballkonin e apartamentit.
Burime bëjnë me dije se aprtamenti është në pronësi të shtetasit Albert Thoma, i cili ia kishte lëshuar me qira shtetases Elena Arza.
Mësohet se kjo e fundit është e afërme e Bernard Sinomatit, një personazheve të njohur të krimit në Vlorë dhe burime bëjnë me dije se grupi hetimor ka mësuar se apartamenti frekuentohej pikërisht nga ky i fundit.
Deri më tani nuk ka asnjë gjurmë nga qiramarrësja dhe as nga Benard Sinomi, i cili nuk përjashtohet pista që të ketë qenë në banesë në momentin e shpërthimit dhe të jetë larguar më pas.
Bernard Sinomati është vëllai i Sokol Sinomatit, ish-anëtarit të bandës së “Gaxhait”, i njohur ndryshe me nofkën “Buzëderri”.
Mbrëmjen e 7 Janarit, Bernard Sinomatit i vranë në Vlorë nipin me snajper (djali i Sokolit), Gëzim Sinomatin, vetëm 23 vjeç.
Në momentin kur u qëllua, viktima ndodhej në ballkon duke pirë cigare, teksa brenda apartamentit dyshohej se ndodhej Bernard Sinomati. Viktima sapo ishte kthyer nga Blegjika, teksa nuk njihej për precedent penal dhe dyshohet se në atë atentat qitësin mund të kenë ngatërruar edhe shënjestër, pasi mund të kenl dashur të vrasin pikërisht Bernard Sinomatin.
Gjithashtu, në Janar të vitit 2022, Bernard Sinomatit i vendosën edhe tritol në automjetin e tij të parkuar në qytetin e Vlorës. Ai është një emër i njohur për policinë, pasi është arrestuar për armëmbajtje pa leje, si dhe është i dënuar në Belgjikë.
Shpërthimi i djeshëm me tritol në Tiranë, vjen vetëm pak ditë, pas atentatit të regjistruar më 18 Dhjetor në qytetin e Vlorës ndaj 30 vjeçarit Kevin Hajrulla, i cili u qëllua me breshëri kallashnikovi, duke mbetur i plagosur rëndë.
Në atë ngjarje, njësoj si në atentatin me snajper ndaj Gëzim Sinomatit, deri tani Policia ka mbledhur vetëm gëzhojat dhe makinat e djegura të autorëve.
Gjithsesi, nuk dihet nëse ka indicie që mund të lidhë dy ngjarjet me njëra-tjetrën.
