Kryeministri i Kosovës, Albin Kurti theksoi gjatë fjalës së tij në seancën e përbashkët plenare mes dy vendeve se agresioni i Rusisë dhe Serbisë e ka bërë urgjente anëtarësimin në NATO.
Sipas tij, aktet terroriste të financuara nga Beogradi në veri të Kosovës tregojnë pafuqinë dhe dëshpërimin e tyre.
“Ne na gëzon fakti që Shqipëria është vend i NATO-s dhe vend kandidat në BE. Ne do anëtarësohemi sepse do të bëhemi gjithmonë më të fortë. Agresioni i Rusisë, sulmet në Kosovë, Rusia dhe Serbia e kanë bërë urgjente anëtarësimin në NATO, besojmë që Shqipërinë e kemi në krah, ta tejkalojmë kriterin që është i vendosur në samitin e Uellsit. Edhe në Kosovë edhe në Shqipëri besoj se duhet t’i kushtojmë rendësi 4 kategorive. Sot në Kosovë mund të ketë akte terroriste sporadike, terrorizmi të financuar nga Serbia është shprehje e pafuqisë së tyre, dikur kur kishin kontrolle i bënin këto akte, ky është fundi i tyre. Aktet terroriste të Serbisë tregojnë dëshpërimin e tyre”, tha Kurti.
Në fjalimin e tij, Kryeministri i Kosovës, Albin Kurti, bëri një përmbledhje të marrëveshjeve të nënshkruara mes Shqipërisë dhe Kosovës, por gjithashtu u ndal edhe tek situata e sigurisë në veri të Kosovës.
Kurti theksoi se Kosova ka tashmë kontroll të plotë mbi veriun e vendit, duke shtuar se aktet e fundit të dhunshme janë dëshmi e dëshpërimit të grupeve që nuk kanë më asnjë kontroll mbi territorin.
Kryeministri i Kosovës theksoi se, ndryshe nga periudha kur këto grupe kishin kontroll të plotë, tani, pasi kanë humbur këtë kontroll, po ndërmarrin akte terroriste. Ai e cilësoi këtë si fundin e sundimit të grupeve të tilla.
“Kemi shtrirë sovranitetin në veri të Kosovës si kurrë më parë. Kemi integritet territorial dhe, megjithëse mund të ndodhin akte sporadike terroriste, nuk ka më burime të brendshme që mund të kërcënojnë sigurinë apo stabilitetin tonë. Paramilitarët e orkestruar dhe të financuar nga Serbia janë të paaftë të destabilizojnë Kosovën për shkak të goditjeve që kanë marrë,” tha Kurti.
