Ernest Muçi pret largimin nga Beshiktashi gjatë merkatos së janarit. Situata e sulmuesit në klub nuk është përmirësuar, ndonëse ai është treguar shpesh vendimtar me lojën e tij për skuadrën turke.
Por në klub janë në vështirësi të mëdha financiare dhe po mendojnë të largojnë lojtarë në role që i kanë të dubluara, me Muçin i cili duket se ka dalë jashtë projektit. Priten oferta për futbollistin shqiptar por me shuma të cilat të kënaqin klubin turk, i cili ka shpenzuar 10 milionë euro për ta blerë nga Legia.
Mediat turke kanë bërë të ditur se pak ditë më parë, një klub i Championship, kategorisë së dytë angleze, ka shprehur gatishmërinë për të blerë Muçin. Sipas të njëjtave burime, për Muçin është ofruar shifra e 3,5 milionë eurove, Por Beshiktash e ka kthyer mbrapsht këtë ofertë, duke e vlerësuar se është shumë e ulët për lojtarin.
Plani i klubit është që të vazhdojë të aktivizojë futbollistin duke synuar që t’i rritë përsëri vlerën në treg, për të rikuperuar paratë që ka shpenzuar për transferimin e tij në janarin e vitit 2024.
