Nga Boldnews.al
Të mërkurën e 18 Dhjetorit, Ministria e Mbrojtjes shpalli kompaninë “Rej” fituese të tenderit për ndërtimin e rrjetit rrugor dhe elektrik të repartit ushtarak në Poçestë të Korçës.
Në procedurën me fond limit 275 milionë lekë të reja (rreth 2.8 milionë euro), morën pjesë 20 operatorë ekonomikë.
Në përfundim, tenderi shkoi për “REJ” me ofertën 197 milionë lekë të reja (rreth 2 milionë euro), pasi më parë një vendim i Komisionit të Prokurimit Publik (KPP) pranoi kërkesën e kësaj kompanie, duke skualifikuar 6 shoqëri që kishin paraqitur ofertën më të ulët.
Kjo procedurë është pjesë e një listë prej dhjetra ankimimesh të dorëzuara nga kompania “REJ pranë Komisionit të Prokurimit Publik.
Megjithëse është një procedurë ligjore, një intensitet kaq i lartë ankimimesh, të cilave vetëm kostot administrative u shkojnë mbi 170 mijë euro, krijojnë dyshimet se kompania e familjes Kapri nga Pogradec kërkon të shpallet fituese nëpërmjet KPP-së së drejtuar nga Jonaid Myzyri në ato procedura që nuk arrin t’i fitojë në garë me konkurentët e tjerë.
Kjo këmbëngulje “REJ” ka qenë rezultative, pasi një seri vendimesh të KPP, pas ankimeve të kompanisë, kanë shkuar në favor të saj.
KPP, tenderat për REJ
Kompania “REJ” është krijuar në vitin 1994 nga biznesmeni Luan Kapri. Aktualisht, Kapri ka 80 përqind të aksioneve, ndërsa pjesë tjetër është në zotërim të kompanisë “Kliva”, me ortak Gëzim Salillari.
“Rej” është e njohur në Pogradec edhe për faktin se Luan Kapri është vëllai i ish-kryebashkiakut të qytetit, Eduard Kapri.
Krahas vendimit të KPP-së për tenderin e Ministrisë së Mbrojtjes, “Boldneës.al” ka kryer verifikime mbi disa prej vendimmarrjeve të Komisionit të Prokurimit Publik, ku ankues ose i interesuar ka qenë shoqëria “REJ”. Vendimet i përkasin periudhës 2020-2023, kohë kur KPP drejtohet nga Myzyri.
Në fokus të këtij verifikimi ishin procedurat tenderuese me fond limit nga disa qindra mijëra deri në miliona euro. Në të gjithë rastet e konsultuara, rezulton se KPP ka pranuar kërkesat e “Rej” shpk,.
– Në Shtator të vitit 2023, Bashkia e Pogradecit zhvillon tenderin “Sistemim i Lumit të Buçimasit dhe Rehabilitimi i Infrastrukturës Rrugore”, me fond limit 79.282.029 lekë të reja. Në procedurë marrin pjesë 9 operatorë ekonomikë, përfshirë edhe “Rej”. Bashkia e Pogradecit i skualifikon të gjithë, për mosplotësim kriteresh.
“REJ” ankohet pranë Komisionit të Prokurimit Pubik, i cili, me vendimin nr. 1196/2023, datë 21 nëntor 2023, e pranon pjesërisht kërkesën, duke e rikthyer në garë. Bazuar mbi vendimin e KPP-së, Bashkia e Pogradecit e shpall fitues
– Në tenderin “Shërbimi i pastrimit dhe grumbullimi i mbetjeve urbane”, me fond limit 49,968,489 lekë të reja, të zhvilluar nga Bashkia Lushnje në dhjetor të vitit 2021, bashkimi i operatorëve “Rej” dhe “Alko Impeks” shpallen fitues paraprakisht.
Një prej konkurentëve e ankimoi këtë vendim në KPP. Institucioni i drejtuar nga Jonaid Myzyri, me vendimin Nr. 110/2022, datë 28 janar 2022, vendosi të mos e pranojë ankimin, duke konfirmuar fitues “REJ” & “Alko Impeks”.
– Në procedurën “Rehabilitim i Rrugës së Rrodokalit, Njësia administrative Proptisht”, me fond limit 58,333,330 lekë të reja, të zhvilluar nga Bashkia Pogradec në qershor 2021, morën pjesë 6 operatorë ekonomikë, nga të cilët u kualifikua vetëm njëri.
Shoqëria “REJ”, e cila ishte një ndër të skualifikuarat, ankimoi vendimin, duke kërkuar skualifikimin edhe të operatorit që kishte mbetur në garë.
Komisioni i Prokurimit Publik, me vendimin nr. 633/2021, datë 5 shtator 2021, vendosi të pranojë ankimin e “REJ” shpk., duke skualifikuar konkurentin e vetëm që kishte mbetur në garë dhe, rrjedhimisht, tenderi u anulua.
– Në tenderin, me objekt “Loti 9, Mirëmbajtje me performancë K/Zëmblak – Liqenas – Dog.
Goricë, Libonik – Rrëmbec – Plasë ”, me fond limit 169,973,967 lekë, të zhvilluar nga Autoriteti Rrugor Shqiptar, kompania “REJ” u rendit e dyta.
Renditja u përmbys në favor të “REJ”, pasi KPP pranoi ankimin e saj, në vendimin nr. 564/2020, miratuar në Dhjetor 2020.
“Rej”, dhjetra ankime në KPP
Aktualisht, Komisioni i Prokurimit Publik ka në shqyrtim dhjetra ankimime të dorëzuara nga shoqëria “Rej”.
Vendimi i Këshillit të Ministrave nr. 236, dt. 20 Prill 2023 përcakton tarifat që duhet të paguajnë kompanitë, në rastet kur dorëzojnë ankimime pranë Komisionit të Prokurimit Publik. Këto tarifa variojnë nga 0.4-0.5 përqind e fondit limit të procedurës tenderuese të ankimuar.
Gjatë vitit 2024, kryesisht në periudhën gusht-nëntor, “Rej” shpk ka ankimuar 17 procedura tenderuese. Vlera e tarifës së paguar për këto ankimime arrin në vlerën e 12.5 milionë lekëve të reja ose afërisht 130 mijë euro. Të gjitha këto ankimime janë aktualisht në fazën e “Shqyrtimit”
Ndërkohë, prej vitit 2022, “Rej” ka ankimuar në total 28 procedura të prokurimit publike, me një faturë për tarifat administrative në total 17.4 milionë lekë të reja ose mbi 170 mijë euro. Një faturë shumë e lartë, por që, mesa duket, “Rej” ka besim tek vendimmarrjet e Jonaid Myzyrit dhe Komisionit të Prokurimit Publik.
Nga shqyrtimi i këtyre ankimimeve, vetëm një numër fare i vogël rezulton në disfavor të shoqërisë “Rej”. Ndërkohë që ato të vitit 2024 janë ende në proces, rezulton se, në vitin 2023 janë shqyrtuar, më së paku 3 ankime të “Rej”, nga të cilat dy janë pranuar nga KPP (shënuar me të kuq në tabelë).
Në vitin 2022, KPP ka shqyrtuar 8 ankimime të “Rej”, nga të cilat ka pranuar 5 prej tyre (shënuar me të kuq në tabelë).
