Pas Scott McTominay një tjetër përforcim mund të vijë nga Premier League te skuadra e Napoli. Këtë gjë e konfirmojnë mediat italiane, që thonë se trajneri Antonio Conte kërkon mbrojtësin e Arsenal.
Bëhet fjalë për polakun Jakub Kiwior, që edhe në ndeshjen e fundit ndaj Everton ka qëndruar në stol. Këtë sezon ai ka ngrohur më së shumti stolin, duke u aktivizuar me pikatore nga trajneri Aerteta (13 takime në total).
Për këtë arsye, 24-vjeçari polak i ka kërkuar klubit që në merkaton e janarit të shohë për alternativa të tjera. Madje ka kërkuar të shitet, gjë që vështirë se mund të ndodhë. Ndaj, Kiwior mund të largohet në formë huazimi.
Ditët në vijim, agjentët e mbrojtësit do të jenë në Itali për një takim me klubin napoletan, ku pritet të luajë gjysmën e dytë të këtij sezoni. Një përforcim që do të ndihmonte shumë trajnerin Conte në arritjen e objektivave të tij.
Jakub Kiwior e njeh mjaft mirë Serie A, pasi ka luajtur për një sezon e gjysmë me Spezia (43 ndeshje) para se të transferohej në Londër.
