Simone Muratore, vetëm 26 vjeç, largohet nga futbolli. Pas debutimit në Serinë A dhe në Champions League me Juventusin, mesfushori është i detyruar të ndalet.
Tri vite më parë, Muratore u diagnostikua me një tumor të rrallë në tru, një sëmundje që, fatmirësisht, arriti ta mposhte, por që nuk e lejoi të vazhdonte të ndiqte ëndrrën e tij.
Vendimi për të varur përfundimisht këpucët e futbollit erdhi zyrtarisht përmes një postimi në rrjetet sociale.
“Kanë kaluar tri vite nga ai moment, një lajm që erdhi si rrufe në qiell të hapur dhe më ndryshoi jetën, si dhe të atyre që më rrethojnë.
Neurocitomë në ventrikulin e majtë. Çaste të mbushura me mendime, pyetje dhe zemërim. Nuk kam derdhur asnjë pikë lot, gjithmonë kam tentuar të dukem i fortë për të tjerët, që nga dita e lajmit deri natën para operacionit, në dhomë me mamanë time, gruan më të fortë që kam njohur ndonjëherë, kur shpërtheva në lot si një fëmijë, me frikën se nuk do të zgjohesha më ose, edhe nëse zgjohesha, nuk do të isha më i njëjti.
Kanë qenë ditë, javë, muaj dhe vite vuajtjeje. Më është dashur të mësoj përsëri të flas mirë, të ec, të vrapoj, të shkruaj, të lexoj, të numëroj; ishte si të rikthehesha një fëmijë dhe të filloja gjithçka nga zeroja. Kishte ditë kur mezi ngrihesha nga shtrati, edhe pse ndihesha më mirë.
Sot i vë një pikë karrierës sime si lojtar. E provova deri në fund për t’u rikthyer, derdha lot dhe djersë, por nuk isha më i njëjti. E kuptova se, sidoqoftë, kisha fatin të isha shëruar dhe të ndihesha mirë. Kam pasur fatin të luaj me lojtarë të jashtëzakonshëm, kampionë brenda dhe jashtë fushe, dhe askush nuk mund të ma heqë këtë.
Jam mirënjohës për gjithçka që kam bërë dhe kam arritur në atë fushë të gjelbër, së bashku me shokët e mi të skuadrës, të cilët u bënë më vonë miqtë e mi. Kanë qenë vite të mrekullueshme; fusha, dhomat e zhveshjes, pasioni – janë gjëra të vështira për t’u shpjeguar, përveç nëse i përjeton vetë.
Falënderoj para së gjithash familjen time që ka qenë gjithmonë pranë meje. Tommason, djali im unik dhe i veçantë, i cili më ka dhënë forcë për të vazhduar përpara, dhe në fund miqtë e mi.
Falënderoj klubet: Juventus, Atalanta dhe Tondela për mbështetjen e tyre. Mëson të vlerësosh gjërat kur je një hap larg humbjes së tyre. Jeta është një dhuratë e mrekullueshme,” shkruan Muratore në Instagram për të shpallur lamtumirën e tij nga futbolli.
