Vëllai i Branko Shkozës 33-vjeçarit që u vra nga shoku i tij Majlind Habibi, ka hedhur poshtë akuzat e autorit që deklaroi se i ngacmonte gruan.
Sipas vëllai të viktimës, Habibi ishte një person problematik dhe se kishte dyshime ndaj tij. Më tej, vëllai i Brankos tha për “Shqipëria Live” se autori dhunon bashkëshortën e tij dhe për këtë është denoncuar më parë.
“I ka thënë nuses time dhe nuses së vetë: ‘A do vini të pini kafe?’, ato i kanë thënë jo. Ai iku të merrte cigare dhe u ul vetëm të pinte kafe. Pas asaj kam ndaluar aty me një shokë te makina ime. Në 7:20 pashë vëllanë ishte te kafja. Ishte me katër veta në tavolinë. Hera e fundit që e kam parë ka qenë në 7:20 te lokali, ndërsa ky lloj robi ka dëshmuar se vëllai im ka dalë nga lokali në 5:20. Të nesërmen në mëngjes më tha mami që s’kishte ardhur vëllai. Ai nuk kishte ngacmuar asnjëherë asnjeri, nuk e ka as emrin në polici që të thuash se ishte problematik. Sa dal unë filloj të pyes komshinjtë, se me atë rrinin bashkë, shokë të ngushtë. Vëllai i autorit di gjithçka, nëna e vet dhe nusja gjithashtu dinë gjithçka.
Më pas dal unë, iki pyes. Të gjithë janë në dijeni dhe më thonë që s’e dinë. Unë dua që të hapen të gjitha kamerat. Vëllai im nuk ka qenë problematik, s’ka ngacmuar nusen e asnjërit. Të pyesim të gjithë lagjen, nëse vëllai im ka ngacmuar ndonjë, ose e ka emrin në polici të ketë shkuar vetëm për verifikim… Të gjithë e dinë ngjarjen si familje. Vëllanë e kam kërkuar tre ditë. Dyshimet i kisha te ky person. Ai është problematik. I ka gjuajtur nuses së vetë me sëpatë, ka qenë në polici.
Unë dua që shteti të marrë masa për këtë lloji robi, për nënën e vetë, për nusen. I kam pyetur, s’më kanë ardhur dhe për bukën e vëllait, për të tretat s’më kanë ardhur. Më erdhën vetëm në varrim. Ai qeshte kur më erdhi në varrim, se i thashë që do e hante dhe ai, sepse pinin bashkë. Nga kjo mendoja se kishte rënë, se thashë tapë. Më kanë ardhur të gjithë si fis këta, e dinin të gjithë ngjarjen. Në momentin kur është arrestuar ai, këta më janë larguar të gjithë. Janë larguar nga shtëpia që ditën e parë që është arrestuar”, tha vëllai i viktimës.
Habibi u arrestua dje nga Policia e Durrësit pasi ai shtyu për vdekje Shkozën në kanalin e ujërave të zeza. I riu dëshmoi se Shkoza i ngacmonte gruan dhe kur i kërkoi që të mos e bënte më, ky i fundit e talli.
Habibi dëshmoi se nuk kishte si qëllim ta vriste dhe se është penduar për krimin. Shkoza, u raportua i zhdukur nga babai i tij më datë 4 dhjetor, pasi kishte humbur kontaktet me të birin prej datës 2 dhjetor. Ai u gjet i pajetë më datë 5 dhjetor në kanalin e ujërave të zeza, ku u raportua si vdekje aksidentale, por pas hetimeve u konstatua se ai ishte vrarë.
Habibi e mbajti të fshehtë vrasjen për 8 ditë, dhe u arrestua mbrëmjen e djeshme nga Policia. I riu dëshmoi në komisariat se e shtyu Shkozën për shkak se i ngacmonte gruan.
