Emisioni “Stop” udhëtoi drejt Peshkopisë, pasi në redaksi erdhi një denoncim për 2 shoferë ambulance, që figurojnë në bordero e paguhen, por nuk paraqiten në punë.
Bëhet fjalë për shtetasit Ervin Veseli dhe Andi Lika, që nuk janë as në grafikun e shpërndarjes së punës.
Qytetarja: Si je?
Roja: Mirë!
Qytetarja: Këtë shoferin e ambulancës, Ervin Veseli, a ka ardh gjë sot, se du me e taku?
Roja: Ky nuk është shoferi, ky është shefi i ambulancave, Edison Veseli.
Qytetarja: Jo! Ervin Veseli!
Roja: Ah nuk e di, nuk e njoh.
Qytetarja: Po Andi Lika?
Roja: S’e di, nuk e njoh.
Qytetarja: Si jeni?
Qytetari: Shofer ambulance?
Shoferi: Po!
Qytetarja: Po kërkoja një të njohurin tim, që duhet ta takoj, Ervin Veseli!
Shoferi: Vini s’punon këtu!
Qytetarja: As Andi Lika, si e ka ai tjetri?
Shoferi: Andi!? Shofer s’….
Qytetarja: Po Andi Lika, o Ervin Veseli, a Andi Lika?
Shoferi: Andi Lika s’punon këtu.
“Stop” kërkoi informacion nga drejtoresha Irini Shehu, por na bllokoi me rojet private. Pyetëm për dy punonjësit Veseli e Lika, por na thanë që nuk punojnë aty.
Në komunikim me shefin e personelit të spitalit Armand Kaloshi, ky i fundit tha se dy personat janë shoferë ambulance, por njëri është me leje e tjetri në punë.
“Këta të dy janë shoferë ambulance përderisa këta punojnë me grafik. Në dijeninë time Ervini është me leje të zakonshme, ndërsa Andi do të jetë këtu, po do e njoftoj nëse doni ta takoni,” tha për mikrofonin e emisionit “Stop”, Armand Kaloshi.
Për Ervin Veselin na sollën leje për periudhën 1-14 Dhjetor, ndërsa për Andin, që ka lëvizur për punë të institucionit, më shumë si shofer i drejtoreshës.
Në fakt, sipas verifikimeve të “Stop” Ervin Veseli në 4 Dhjetor ka dalë jashtë kufirit, një dukuri kjo e përsëritur, edhe pse atij i vijon pagesa. Si përfundim, në grafikun e punës janë 12 vetë, ndërsa në bordero paguhen 15 të tillë si shoferë ambulance.
Gazetarja: 15 shofer ambulancash apo jo?
Armand Kaloshi: Po!=
Gazetarja: Pse në grafik janë 12? Pse është ndarë puna vetëm tek 12 këta 3 të tjerët ku shkojnë?
Armand Kaloshi: Nëse paraqisni kërkesën në protokoll unë ju jap çdo informacion të mundshëm./tvklan
