Operacioni në Skoci gjatë muajit Mars në dy raste. Në fillim u arrestua një 48-vjeçar që kishte ngritur fermë hashashi me vlerë 1 mln paund dhe më pas 2 të rinjtë që gjenin dyqane të boshatisura dhe i kthenin në shtëpi bari në Galashiels.
Dy shqiptarë kanë pranuar dje (9 Dhjetor) përfshirjen e tyre në kultivimin e kanabisit me vlerë mbi 1 mln paund, të zbuluar në njësitë e boshatisura të shitjes me pakicë, në qendër të Galashiels dhe të kthyera në ‘shtëpi bari’ në Britaninë e Madhe.
Një i tretë gjithashtu, në proces të mëvetësuar, u deklarua fajtor për të njëjtën akuzë, pasi ktheu një dyqan bastesh në fermë kanabisi në Skoci, me vlerë 1 mln paund.
Shpëtim Halili, 36 vjeç dhe Besim Velija, 63 vjeç, u arrestuan në Skoci pasi policia hyri në ish-dyqanin në ‘Channel Street’, në muajin Mars të këtij viti. Gjykata e Selkirk dëgjoi faktet e Prokurorisë, se më shumë se 1300 bimë, në faza të ndryshme të rritjes u kapën në aksion, njofton media britanike.
Vlera totale e ngarkesës vlerësohet midis 456,960 dhe 1,142,400 paund. Të dy burrat u deklaruan fajtorë. Ata thanë se ishin të shqetësuar për situatën ku ndodhen, teksa akuzohen për kultivim dhe furnizim droge.
Dënimi është shtyrë deri më 30 Dhjetor për të mësuar edhe masën e dënimit nga gjykata. Por Sherifi Peter Paterson paralajmëroi se çifti i shqiptarëve ka të ngjarë të ketë një dënim me burg. Në kohën e operacionit të kryer në mars, policia e vlerësoi drogën e kapur 2 shqiptarëve në 2,3 mln paund, por tashmë që gjyqi është në proces shifra ka ndryshuar.
Petrit Musta, një tjetër shtetas shqiptar, u deklarua fajtor për furnizimin e drogës së klasit B, në zonën e Skocisë dhe që besohet se është pjesë e të njëjtit grup. Prokurorja India MacLean i tha Gjykatës Sherif të Jedburgh se si oficerët e policisë bastisën ish-dyqanin lokal bastesh, në Channel Street, në 26 mars dhe panë Mustën duke u përpjekur të largohej nga ndërtesa përmes zjarrit.
Ajo tha se 360 bimë u gjetën në një dhomë dhe 1000 bimë të tjera në një dhomë më të madhe.
MacLean shpjegoi se kishte pasur “operacion të sofistikuar dhe të organizuar”. Avokati i Mustës shpjegoi se klienti kishte punuar në Belgjikë në vitin 2022 dhe kishte paguar 18,000 paund për t’u transportuar në Britaninë e Madhe, me një kamion dhe mbërriti në Birmingham në vitin 2023, ku ai punonte ilegalisht në një lavazh.
Atij iu afruan dhe iu ofrua një punë në Skoci, duke punuar në ndërtim, por kur mbërriti, zbuloi se do të ishte një “kopshtar” për kultivimin e kanabisit. Avokati pretendoi se fillimisht tha “jo”, por më pas pranoi postin pasi ishte kushte më të mira sesa të punonte në një lavazh.
Sherifi Kevin McCarron i tha Mustës:
“Kjo është një vlerë thelbësore e kanabisit dhe një dënim thelbësor me burgim është i pashmangshëm”.
