Janë zbardhur detaje të reja nga shpërthimi me tritol, i regjistruar në orët e para të mëngjesit të sotëm në lokalin “The Boss” në zonën e “Ujit të Ftohtë” në qytetin e Vlorës.
Burimet zyrtare bëjnë me dije se lokali është në pronësi të shtetases me inicialet R. B., teksa mësohet se “The Boss”, i cili funksiononte si bar, restorant dhe piceri, nuk kishte funksionuar prej kohësh, por kishte vetëm pak ditë që ishte rihapur.
Ambientet e lokalit survejoheshin me kamera sigurie dhe burime pranë grupit hetimor bëjnë me dije se ato kanë filmuar gjithçka.
Mësohet se kamerat e lokalit kanë filmuar autorin, i cili ka qenë me maskë. Ai ka shkuar nga ana e lokaleve dhe pasi ka vendosur tritolin me fitil, e ka ndezur atë duke shkaktuar shpërthimin.
Më pas, ai është larguar mes pallateve. Burime bëjnë me dije se edhe kamerat përreth kanë filmuar lëvizjet e autorit.
Si paspojë e shpërthimit pati vetëm dëme materiale, ku pjesa ballore e lokalit, e cila ishte me xhama, është dëmtuar dhe thyer.
Në njoftimin e shkurtër për mediat, Policia e Vlorës bëri me dije se po punojnë për identifikimin e autorit.
“Rreth orës 06:00, në lagjen “Uji i Ftohtë”, në një lokal, në pronësi të shtetases R. B., ka shpërthyer, dyshohet lënde plasëse, ku si pasojë janë shkaktuar vetëm dëme materiale. Grupi hetimor vijon veprimet për sqarimin e rrethanave të ngjarjes, identifikimin dhe kapjen e autorit/ëve.” – thuhej në reagimin e bluve të qytetit bregdetar.
