Policia e Fierit ka goditur një rast të aktivitetit të paligjshëm të shitjeve të lëndëve narkotike , ku si “bazë” ishte kthyer një lokal në lagjen “1 Maji”.
Burime zyrtare bëjnë me dije se kanë arrestuar një grua e cila ishte e punësuar si kameriere dhe banakiere dhe akuzohet se shiste drogën në lokalin ku u krye ndërhyrja.
Në kuadër të operacionit “Drugs” është vënë në pranga shtetasja Marinela Kita, 42 vjeçe, e cila akuzohet për veprën penale “prodhimi dhe shitja e narkotikëve”
Autoritetet raportojnë se ajo është kapur në lokal me një sasie kanabisi me vete, teksa në ambientet e lokalit janë gjetur dhe mbetje të lëndës narkotike kanabis sativa që dyshohet se ishte konsumuar nga klientë të ndryshëm të lokalit.
Gjithashtu, Policia ka shpallur në kërkim edhe pronarin e lokalit, shtetasin Sokol Osmëni, 43 vjeç, banues në Fier, për veprën penale “përshtatja e lokalit për përdorim droge”
Blutë e Fierit kanë proceduar edhe një 30-vjeçar, shtetasi M. O., kushëriri i pronarit të lokalit, pasi gjatë kontrollit të automjetit të parkuar në lokali i janë gjetur 13000 euro të dyshuara të përfituara nga veprimtaria kriminale. Ai akuzohet për veprën penale “pastri i produkteve të veprës penale ose veprimtarisë kriminale”.
Në cilësinë e provës materiale janë sekuestruar lënda narkotike, paratë, 1 automjet, 1 grirëse dhe 3 celularë. Teksa vijon puna për kapjen e pronarit të lokalit dhe dokumentimi i plotë ligjor i kësaj veprimtarie kriminale.
