Policia e Shtetit në bashkëpunim me Prokurorinë e Tiranës ka arrestuar tre të rinj, mes tyre një vajzë, të cilët akuzohen për shantazh ndaj një 36-vjeçari me materiale filmike intime.
Në kuadër të operacionit policor të koduar “Shtrëngimi” janë vënë në pranga shteasit A. M., 29 vjeç dhe M. Sh., 26 vjeçe, teksa më 24 tetor është arrestuar edhe shtetasi S. S., 23 vjeç.
Ky i fundit, atë ditë është kapur në flagrancë duke i marrë 20 mijë euro 36-vjeçarit, të cilit ia kishte kërkuar në këmbim të mospublikimit të pamjeve filmike.
“Nga hetimet dyshohet se 3 shtetasit e kanë kanosur 36-vjeçarin, që t’iu jepte 20 000 euro, në mënyrë që ata të mos i publikonin fotografi dhe video me përmbajtje intime.” – thuhet në njoftimin e Policisë.
Të arrestuarit akuzohen për veprën penale “Shtrëngimi me anë të kanosjes ose dhunës për dhënien e pasurisë”, kryer në bashkëpunim.
Materialet procedurale i kaluan Prokurorisë së Tiranës për veprime të mëtejshme.
