Policia e Korçës ka zbardhur ngjarjen e djeshme, ku 47-vjeçari Çelnik Malçellari nga fshati Sovjan i Maliqit, u gjet pa shenja jete në rrethana misterioze brenda automjetit, në lagjen nr. 10 të qytetit juglindor, në një rrugë dytësore në unazën e Korçës.
Burimet zyrtare bëjnë me dije se nga hetimet dhe nga ekzaminimet e deritanishme mjekoligjore, dyshohet se 47-vjeçari ka humbur jetën si pasojë e hipertensionit.
Blutë e juglindjes bëjnë me dije se kanë arrestuar shtetasen V. Sh., 37 vjeçe, e cila rezulton se ka qenë në automjet, duke kryer marrëdhënie seksuale me viktimën Çelnik Malçellari kundrejt pagesës. Ajo akuzohet për veprën penale “Prostitucioni”.
Policia njofton se vijon punën për sqarimin dhe dokumentimin e plotë të rrethanave të rastit.
Ndërkohë, burime për mediat bëjnë me dije se nga kryqja në vendin e ngjarjes (në mjet) dyshohet që viktima mund të ketë pirë stimulues, si pasojë e të cilave dyshohet se ka gjetur vdekjen.
Ai kishte humbur kontaktet që prej mëngjesit me familjarët, pasi kishte shkuar për punë në Korçë dhe pas disa thirrjeve telefonike pa asnjë përgjigje, bashkëshortja e Malçellarit ka bërë kallëzimin në komisariatin e Maliqit.
Pas kërkimeve ai u gjet pa shenja jete në automjetin e tij.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë.
