Një 47-vjeçar është arrestuar nga policia, pasi gjatë një kontrolli fizik që ai iu nënshtruar, iu gjetën doza të lëndës së dyshuar narkotike kanabis, gati për shitje.
Gjithashtu u procedua një 18-vjeçar që i kishte blerë lëndën narkotike 47-vjeçarit.
“Goditet një rast i shpërndarjes së lëndëve narkotike në doza, arrestohet në flagrancë 1 shtetas dhe procedohet penalisht 1 tjetër.
Sekuestrohen doza të lëndës së dyshuar narkotike kanabis, gati për shitje.
Shërbimet e Komisariatit të Policisë Nr. 6, bazuar në informacionet e siguruara përmes inteligjencës informative, për një rast të shitjes së lëndëve narkotike në zonën e Kombinatit, kanë organizuar punën për kapjen e autorëve të dyshuar dhe kanë arrestuar në flagrancë shtetasin E. M., 47 vjeç, banues në Tiranë. Gjithashtu proceduan në gjendje të lirë shtetasin G. Gj., 18 vjeç, banues në Tiranë.
Shërbimet e Policisë kanë konstatuar në Kombinat, shtetasit e lartpërmendur, të cilëve gjatë kontrollit fizik iu kanë gjetur dhe sekuestruar doza të lëndës së dyshuar narkotike kanabis, gati për shitje. Nga veprimet hetimore ka rezultuar se 18-vjeçari ia kishte blerë lëndën narkotike shtetasit E. M.”, thuhet në njoftimin e policisë.
Materialet i kaluan Prokurorisë.
