Një raport i publikuar nga një komision i Kongresit amerikan, pas një hetimi dyvjeçar mbi pandeminë e koronavirusit, sugjeron se Covid-19 mund të ketë origjinën nga një laborator në Wuhan të Kinës. Raporti, me një gjatësi prej 520 faqesh, thekson se nuk ka prova të mjaftueshme për të mbështetur teorinë e origjinës natyrore të virusit, duke përmendur karakteristika biologjike që nuk gjenden në natyrë.
Komisioni ngre dyshime mbi masat si distancimi social, përdorimi i maskave dhe karantinat, duke theksuar se këto politika nuk janë mbështetur nga të dhëna të forta shkencore. Në raport përmendet gjithashtu se disa studiues të laboratorit në Wuhan raportohet se janë sëmurur me një virus të ngjashëm në fund të vitit 2019, para shpërthimit të pandemisë.
Raporti përmend edhe dëshmi të imunologut amerikan, Anthony Fauci, i cili gjatë një seance me dyer të mbyllura ka pranuar se disa masa, si distancimi social, nuk kishin një justifikim të bazuar në shkencë.
Ky përfundim i ri përforcon debatin global mbi origjinën e virusit dhe mënyrën se si u trajtua pandemia nga autoritetet në mbarë botën.
