Fitorja 3-1 ndaj Elbasanit ishte një konfirmim i ndryshimit tek Egnatia, që pas atij fillimi të ngadaltë të sezonit.
Është e qartë se rrogozhinasit e kanë shtuar ritmin dhe kanë ndryshuar “marsh”, ç’ka reflektohet edhe në tabelën e klasifikimit. Në 4 ndeshjet e fundit skuadra e drejtuar nga trajneri Edlir Tetova ka marrë 10 pikë nga 12 të mundshme.
Ata tashmë janë ngjitur në vend të dytë dhe e shohin Partizanin kryesues vetëm 2 pikë larg. Një pozicionon ky që e bën më motivuese situatën tek Egnatia përpara përballjes pikërisht me rivalin kryesor.
Rrogozhinasit janë më të karikuar për sfidën e së enjtes, ku kanë mundësinë e “hakmarrjes” për humbjen e fazës së parë, që e pësuan në fushën e tyre.
Për ndeshjen e radhës me të kuqtë në kryeqytet trajneri Tetova do ta ketë skuadrën të plotë teksa rikthehen nga skualifikimi për shkak kartonësh dy mbrojtësit e krahëve, Ndreca dhe Fangaj.
