Autori i dyshuar i vrasjes së Alfred Dedjas, 26-vjeçari Julian Gjoshi, është vetëdorëzuar në polici 24 orë pas krimit.
Ngjarja ndodhi ditën e djeshme në një lokal në fshatin Ndroq në Tiranë, kur 26-vjeçari u fut në ambientet ku viktima po drekonte me miq dhe e qëlloi me disa plumba.
Pas ngjarjes, ai është arratisur nga vendi i krimit me mjetin e tij tip “Benz”, por sipas policisë pasi janë bërë bllokimet e pikave të kalimit dhe pamundësia për të qëndruar i fshehur, është dorëzuar sot.
Ende nuk dihen arsyet se përse i riu kreu vrasjen, ndërsa dyshime hidhen për prishje pazaresh droge, dhe se ata ishin miq më herët.
“Në vijim të veprimeve për ngjarjen e ndodhur më datë 01.12.2024, ku rreth orës 15:30, në një lokal në Ndroq, mbeti i vrarë me armë zjarri shtetasi A. D., rreth 50 vjeç, ju informojmë se:
Falë veprimeve të shpejta dhe të koordinuara të Policisë së DVP Tiranë në bashkëpunim me Drejtorinë Vendore të Policisë Durrës, kontrolleve të shumta të ushtruara bazuar në inteligjencës policore, gjetjen dhe bllokimin e automjetit të dyshuar që kishte përdorur autori, si dhe bllokimit të rrugëkalimeve dhe pamundësisë për të qëndruar i fshehur, autori i dyshuari u dorëzua në Polici.
Në vijim të veprimeve Specialistët për hetimin Krimeve të Rënda në Drejtorinë Vendore të Policisë Tiranë bënë ndalimin e autorit të dyshuar, shtetasit J. Gj., 26 vjeç, banues në Shijak.”- njofton policia.
Grupi i posaçëm hetimor, në drejtimin e Prokurorisë, po vijon punën për zbardhjen e plotë të rrethanave të ngjarjes dhe dokumentimin e saj ligjor.
Kujtojmë se autori i dyshuar, Julian Gjoshi është kunati i Altin Hajrit, një prej personazheve të njohur të botës së krimit në Shijak dhe i shpallur prej disa vitesh në kërkim për rrëmbimin e Jan Prengës.
- Si ndodhi krimi?
Viktima dhe autori mësohet se kishin njohje me njëri-tjetrin, si edhe ishin miq. Të dy, sipas dëshmitarëve, e frekuentonin shpesh zonën e Ndroqit dhe lokalin ku ndodhi vrasja.
Krimi ndodhi brenda lokalit dhe sipas disa dëshmitarëve, mes autorit të dyshuar të krimit dhe viktimës ka pasur një debat, përpara se 27-vjeçari të qëllonte me armë zjarri në drejtim të “Daku”-t.
Raportohet se Julian Gjoshi ka qëlluar 5 plumba, por vetëm 3 plumba kanë kapur në trup 50-vjeçarin, i cili humbi jetën në vendngjarje.
- Makina me të cilën Julian Gjoshi u largua nga vendi i krimit
Autotomjeti tip “Benz” në videon e mëposhtme dyshohet se është përdorur nga 27-vjeçari Gjoshi për t’u arratisur nga vendi i ngjarjes, lokali në Ndroq ku qëlloi Dedjen.
Makina është gjetur e braktisur në fshatin Shkallnur, teksa brenda saj blutë e Tiranës bëjnë me dije se nuk është konstatuar asgjë e paligjshme. Automjeti është transportuar në ambientet e Policisë, ku do t’i nënshtrohet ekspertizës.
