Qeveria spanjolle ka miratuar një sërë masash për t’i mbrojtur punëtorët nga rreziqet e shkaktuara nga ndryshimet klimatike. Pas përmbytjeve vdekjeprurëse në Valencia, ku disa punëtorë humbën jetën gjatë rrugës për në shtëpi, qeveria prezantoi legjislacionin që synon të parandalojë tragjedi të ngjashme.
Një nga masat e reja është e ashtuquajtura “leje klimatike”, e cila u lejon punëtorëve të mungojnë në punë gjatë përkeqësimit të të motit dhe të marrin page edhe pse në mungesë. Në një konferencë për shtyp, Ministri i Ekonomisë Carlos Cuerpo tha se punëtorët mund të kërkojnë pagë nëse nuk mund të vijnë në vendin e tyre të punës dhe nuk mund të punojnë në distancë.
Parlamenti do të ketë një muaj kohë për ta kthyer në ligj këtë dekret që u lejon punëtorëve të marrin deri në katër ditë leje me pagesë në rast të kushteve ekstreme të motit që mund të rrezikojnë jetën e tyre në udhëtimin nga shtëpia drejt vendit të punës. Një legjislacion i ngjashëm ekziston në Kanada dhe parashikon që njerëzit mund të vlerësojnë nëse duhet të përfitojnë nga pushimi me pagesë pas paralajmërimeve për klimën të lëshuara rregullisht nga autoritetet kompetente.
Kjo masë shihet si një reagim për të shmangur ngjarje si ajo ku humbën jetën të paktën 230 njerëz dhe u shkaktuan dëme të mëdha në shtëpi, biznese, automjete dhe infrastrukturë. Ligji përcakton se punonjësi mund të përfitojë leje vetëm nëse kompania jep pëlqimin e saj, në të kundërt nuk është e mundur të aktivizohen mbrojtjet e parashikuara nga leja klimatike. Rregulloret e reja janë pjesë e një pakete të tretë ndihme me vlerë 2,2 miliardë dollarë për ta ndihmuar Valencian të rimëkëmbet.
