Ish-drejtuesi i Policisë se Shtetit, Shemsi Prençi, ka komentuar dosjen voluminoze të “Suel Çelës”, ku tha se grupi i strukturuar kriminal të jetë i plotë, duhet që SPAK të përmende edhe politikanët e përfshirë në këtë dosje.
Prençi deklaroi në A2CNN se SPAK duhet të veprojë edhe “ndaj deputetëve, ministrave dhe kryetarëve të bashkisë që kanë qenë në dispozicion të organizatës kriminale.”
“SPAK ka goditur deri në brez, por nuk ka shkuar më lart. Pra nuk ka treguar se çfarë ka folur politika me grupin e Suel Çelës. Dhe jo vetëm. Unë do të vazhdoj ta denoncoj publikisht. Sic e mbështes SPAK me gjithë energjitë e mira, do të vijoj ta kritikoj, opinioni publik e do organizatën kriminale të kompletuar.”, tha ai.
Ka një rrugë që e bën pis SPAK. Ne kishim paralajmëruar që do të kishte edhe politikanë.
Prençi flet për njerëz me pushtet që kanë mbështetur grupet kriminale kundër grupit tjetër dhe që kanë abuzuar me fondet publike, duke i lënë në dorë të organizatave kriminale.
“Materialet që në kishim paralajmëruar… tregojnë se është e vërtetë ajo që dinte mbarë opinioni publik, sot mbetemi të habitur, përse politika nuk del në skenë.”
Sipas tij, përdoruesit e platformave si SKY ECC kanë mbi 60 mijë përdorues dhe mbi 20% e tyre janë shqipfolës.
Sipas tij, që SPAK të jetë në rrugën e duhur duhet të godasë krimet e politikës dhe krimet zgjedhore.
“Sepse gjithçka buron nga këto të dyja. Nëse mafia nuk ka mbështetjen e politikës dhe nuk kanë marrëdhëniet merr jep për interesa të zgjedhjeve, policia i shtrin në tokë të gjithë në tre muaj.”
Por çfarë e pengon strukturën e posaçme që të godasë atë pjesë të politikës që është e implikuar?
Prençi thotë se kjo mbetet për t’u zbuluar por shton se kemi të implikuara të gjitha nivelet e politikës qendore. Dhe fuqia vepruese e SPAK mbetet deri diku e kufizuar, duke përmendur këtu se të gjithë ata që kanë përfunduar pas hekurave janë sot “isha”, pra janë vënë në pranga pasi kishin lënë detyrën.
